Ши җинпиң үчинчи қетим хитайниң рәиси болди

Мухбиримиз җәвлан
2023.03.10

3-Айниң 9-күни, хитай компартийәсиниң баш секритари ши җинпиң хитай хәлқ қурултийиниң 14-нөвәтлик вәкиллири йиғинида хитайниң үчинчи қетимлиқ дөләт рәиси вә хитай һәрбий комитетиниң рәиси болди.

Хитай мәтбуатлирида “ши җинпиң толуқ аваз билән дөләт рәисликигә сайланди” дейилгән. “америка авази” ториниң хәвиридә көрситилишчә, хитай компартийәси таллиған 2952 вәкилниң бу йиғинда толуқ аваз бериши, бирму қарши авазниң чиқмаслиқи шәрт икән. Йәнә келип бу “сайлам” да ши җинпиңдин башқа бирму намзат йоқ икән.

“америка бирләшмә агентлиқи” ниң хәвиригә қариғанда, 2012-йил хитайниң һакимийәт бешиға чиққан вә рәқиблирини бир-бирләп мәғлуб қилған ши җинпиң һазир хитайниң юқири қатлимида мутләқ нопузға игә шәхс болуп, шәкилвазлиқ билән толған бу қурултайда қайта рәис болуп сайлиниши нормал әһвал икән.

Ши җинпиң йәнә бу йиғинда 2 милйон хитай әскиригә қоманданлиқ қилидиған һәрбий ишлар комитетиниң рәисликигә “сайланған” болуп, һәрбий комитет әмәлийәттә дөләткә әмәс, партийәгә қарайдикән.

“франсийә агентлиқи” ниң хәвиридә ейтилишичә, бу йил 69 яшқа киргән ши җинпиң, хитай рәһбәрлириниң икки қарарлиқ вәзипә өтәш чәклимисини аллиқачан бузуп ташлап, өмүрлүк һоқуқ тутуш йолини һазирлиған болуп, башқа рәқиблири чиқмиған әһвалда у йәнә 70 нәччә яшқа киргичә хитайни контрол қилип туридикән.

Ши җинпиң бу вәкилләр йиғинида америка башлиқ ғәрб әллириниң хитайни қисмаққа алғанлиқини вә хитайниң тәрәққиятиға мисли көрүлмигән дәриҗидә тосқунлуқ қиливатқанлиқини, хитайни бу палакәтләрдин аман-есән өткүзидиған шәхсниң өзи икәнликини җакарлиған.

“франсийә радийоси” ториниң хәвәр қилишичә, америка ахбарат органлири 8-март күни дөләт мәҗлисигә сунған бир доклатта, үчинчи қетим рәис болған ши җинпиңниң кәлгүси бир нәччә йилда тәйвәнни бесивелишқа һәмдә американиң тәсирини аҗизлитишқа урунуши мумкинлики көрситилгән. Һалбуки, ши җинпиңниң алдида у һәл қилишқа тегишлик нурғун кирзислар, йәни хитай иқтисадиниң чөкүши, нопусниң қерилишиши, америка билән болған мунасивәтниң яманлишиши, һалқилиқ техникида аҗизлиқи, тәйвән мәсилиси вә уйғур мусулманлириниң кишилик һоқуқ мәсилиси қатарлиқлар бар икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.