Yaxu tori maqalisi: shi jinpingning yéngi dunya tertipi köz aldimizda weyran bolidu

Washin'gtondin muxbirimiz jewlan teyyarlidi
2023.06.16

6-Ayning 15-küni “Yaxu xewerliri” torida xitayning omumiy weziyiti we teqdiri heqqide bir maqale élan qilin'ghan bolup, uningda éytilishiche, xitayning irqiy qirghinchiliqi, siyasiy öktemliki, tor jasusluqi, eqliy mülük oghriliqi, kowid yuqumi arqiliq peyda qilghan gumani, mal teminlesh monopulluqi, rusiye bilen birlishiwélishi, teywen'ge tehdit sélishi qatarliq qilmishliri dunyaning gi'o-siyasiy we iqtisadiy munasiwetliride xitaygha paydisiz weziyet shekillendürmekte iken.

Aptor bu maqaliside, xitayning özige oxshash mustebit, zorawan hakimiyetler bilen ittipaqliship gherbke qarshi sep tüzüwatqanliqini, amérika bilen yawropa otturisidiki bezi ziddiyettin ustiliq bilen paydiliniwatqanliqini tekitligen. U yene xitayning “Bir belwagh bir yol” arqiliq iqtisadiy kéngeymichilik qiliwatqanliqini, dunya soda teshkilatining qanunlirigha xilapliq qilip, dunya sodisi we mal teminleshni kontrol qilishqa urunuwatqanliqini, axirida mustebitlikni dunyagha hakim qilip, özini bolsa dunyaning derijidin tashqiri küchige aylandurushqa küchewatqanliqini, emma buni ishqa ashurushqa uzun waqit kétidighanliqini we küch-madari yetmeydighanliqini otturigha qoyghan. Chünki shi jinping gherb dunyasining qimmet qarishi we dunyaning démokratik yüzlinishige xilap heriket qiliwatqan bolup, jezmen küchlük qarshiliq we tosqunluqqa uchraydiken hemde tedrijiy weyran bolidiken. Xitaydiki ishsizliq, iqtisadidiki chékinish, chet el shirketlirining xitaydin ayrilishi buning deslepki alametliri iken.

Bu maqalining aptori matiw handérson (Matthew Henderson) hénri jakson jem'iyiti asiya tetqiqat merkizining bashliqi bolup, oksford, kembrij we béyjing uniwérsitétlirida oqughan, xitay mesililirini chongqur közetken we köpligen maqalilerni élan qilghan mutexessis iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.