Shi jinping 20-qurultayda qa'idini buzup, “Xitayning mutleq rehbiri” bolush qedimini basqan

Xitay kompartiyesining 20-qurultiyi 22-öktebir küni ayaghlashti. Xitay kompartiyesining bash sékritari shi jinping, xitay kompartiyesining ikki qarardin artuq bash sékritar bolmasliq qa'idisini buzup, 3-qétim bash sékritar boldi.

Bu qurultayda xitay kompartiyesi merkiziy komitéti siyasiy byurosining da'imiy hey'et ezliri, hey'et ezaliri we kandidat ezaliri “Saylap chiqilghan” bolup, ularning hemmisi dégüdek shi jinpingning ademliridin teshkil tapqan.

Xitay kompartiyesining sabiq bash sékritari xu jintawning terepdarliri dep qaralghan li kéchiyang, wang yang, xu chünxu'a qatarliqlarning hemmisi birdek siyasiy byorudin chiqiriwétilgen. Xu jintawning özimu qurultayning axiriqi meydandiki xitay kompartiyesi merkiziy komitétining yéngi nöwetlik ezalirini élan qilish esnasida yighin meydanidin sörep élip kétilgen.

Shangxey sheherlik partkomning bash sékritari, shangxeyni qamal qilishta töhpe qoshqan li chiyang bilen béyjingdiki töwen kirimlik puqralarni heydep chiqarghan sey chi qatarliqlar siyasiy byoroning da'imiy hey'et ezasi bolghan.

Chet el taratquliri bu heqte köpligen maqalilerni élan qilip, shi jinpingning bu qétim özige sadiq ademlirini toplap, öz hoquqini téximu chongaytip, tarixtiki eng chong mustebit stalin we maw zédungning yolini tutup, xitayni zawalliq yoligha bashlawatqanliqini otturigha qoyghan.

“Nyo-york waqti géziti” de élan qilin'ghan bir maqalide körsitilishiche, shi jinping bu qurultayda “Ikki qarardin artuq wezipe ötimeslik” qa'idisini buzghandin bashqa, “68 Yashta ikkinchi sepke chékinish” qa'idisinimu buzghan bolup, 67 yashliq li kéchiyangni siyasiy biyorodin chiqiriwétip, 72 yashliq herbiy emeldar jang yoshyani siyasiy byoroning ezasi qilip saqlap qalghan. Yawro-asiya siyasiy tetqiqat merkizi xitay siyasiti analizchisi nil tomasning qarishiche, xitay hazir shi jinpingning hoquqi mutleq kéngeygen bir dewrge kirgen bolup, shi jinping buningdin kéyin siyasiy kontrolluqni kücheytidiken, dölet iqtisadini monopul qilidiken, diplomatiyede qattiq siyaset qollinidiken.

“Blombérg” torida élan qilin'ghan bir maqalide tehlil qilinishiche, shi jinpingning xitayda mutleq hökümdar bolushi, nopusi eng köp bir döletning zawalliqqa yüzlinishi we kelgüsidiki dunyaning maliman bolush xewpini kücheytidiken.