Shi jinpingning moskwagha ziyaretke baridighanliqi zor ghulghula qozghidi

Xitay re'isi shi jinpingning yéqinda moskwagha ziyaretke baridighanliqi melum bolghandin kéyin herqaysi axbarat wastiliride bu heqtiki türlük mulahize we ghulghula keng yer élishqa bashlidi.

“Wal strét zhurnili” gézitining 21-féwraldiki xewiride éytilishiche, xitay hökümiti izchil özlirining toqunush we urushni axirlashturushta aktip rol oynash arzusining barliqini tekitlewatqan bolup, bu qétim shi jinping moskwada rosiye prézidénti wiladimir putin bilen uchrashqanda mushu téma boyiche sözlishidighanliqi heqqide bir qisim pikirler otturigha chiqqan. Emma gherb dunyasi bu xewerlerdin bekmu gumanda boluwatqan bolup, buning delili süpitide xitay diplomatiyesidiki birinchi nomurluq shexs wang yining “Myunxén xewpsizlik mejlisi” diki ipadisini tilgha alghan. Shu qétim wang yi muxbirlarning so'allirigha jawap bérip “Xitay bilen rusiyening munasiwiti qiya tashtek mustehkem bolup, xelq'ara weziyette körülgen herqandaq özgirishlerning siniqidin öteleydu” dégen.

Nöwette xitay hökümitining rusiye qozghighan ukra'inagha tajawuz qilish herkitini maddiy we meniwi jehettin qollawatqanliqi köp tereplime uchurlardin melum boluwatqan bolup, roytérs agéntliqining xewiride bu hal “Ukra'ina urush weziyitini téximu xeterlik terepke buriwétishi mumkin” dep yekünlinidu. Chünki rusiye prézidénti putin bu qétim moskwagha ziyaretke kelgen wang yi bilen mexsus söhbette bolghanda éniq qilip “Shi jinpingning ziyariti ikki terep munasiwitide yéngi jenggah yaritidu” dégen. Shuningdek ikki terep sodisining pat yéqinda 200 milyarda amérika dolliridin éship kétidighanliqini bildürgen.

Roytérs agéntliqining bu heqtiki xewiride éytilishiche, shi jinpingning éniq ziyaret waqti hazirche namelum bolup, belkim april yaki may aylirida bolushi mumkin iken.