“муһапизәтчи” гезити:“ши җинпиң бәлким вабадин өтәлмәслики мумкин!”

Мухбиримиз әзиз
2023.01.03

Хитай һөкүмити таки йеқинқи мәзгилләргә қәдәр өзлири қаттиқ қоллуқ билән иҗра қилип кәлгән “вирус юқумини нөлгә чүшүрүш” сияситини сотсиялизм түзүминиң, шуниңдәк хитай компартийәсиниң қандақ “әвзәл” вә“дана” икәнликигә испат қилип кәлгәниди. Әмма хитайдики вирус юқуминиң шиддәт билән өрлиши кәлтүрүп чиқарған реаллиқ хитай рәиси ши җинпиңни “биз техиму көп тиришчанлиқ билән вирусқа қарши бир мәйдан кәскин күрәшкә тәйярлинишимиз лазим” дейишкә мәҗбур қилди. Әнглийәдики “муһапизәтчи” гезити бу әһвалларни омумлаштуруп “ши җинпиңниң дөләт ичидики абройила әмәс, дуня алдидики образиму мушу қетимлиқ вирус вабасида һалак болуши мумкин” дегән.

Исабел хилтон (Isabel Hilton) имзасида 1-январ күни елан қилинған обзорда ейтилишичә, нөвәттә түрлүк учур йоллиридин вә иҗтимаий таратқулардин мәлум болуватқан хәвәрләр хитайдики вирус вабасиниң қанчилик дәһшәтлик болуватқанлиқини намаян қилмақта икән. Әмма хитай һөкүмити изчил вирустин келип чиққан өлүм санини, бир қисим яман нийәтлик кишиләрниң өсәк сөз тарқитиватқанлиқини тәкитләшкә өткән. Шуниңдәк вирус вабасиниң қайта ямриши мәнтиқигә уйғун икәнликини, буниң әмәлийәттә еғиррақ зукамдин пәрқ қилмайдиған һадисә икәнликини, хитай тебабитиниң буни давалап кетәләйдиғанлиқини қайта-қайта тилға алған. Бу һал уларниң үч йил илгири вирус вабаси башланған мәзгилләрдики “һәммә ишлар яхши меңиватиду” дегәндәк ялғанлиридин қилчә пәрқ қилмайдикән.

Обзорда ейтилишичә, гәрчә хитай хәлқи “компартийә ақни <қара> десә шуниңға ишиниш” кә адәтләнгән болсиму өткән үч йиллиқ қамалда үнүмлүк ваксина барлиққа кәлмәслик, тәшвиқат билән реаллиқ арисидики ғайәт зор пәрқ дегәнләр хитай хәлқиниң тақитини бир йәргә апарған. Әнә шу сәвәбтин үрүмчи шәһиридики от апитидин кейин хитай миқясида һөкүмәтниң вабани контрол қилиш сияситигә қарши намайишлар оттуриға чиққан. Әмдиликтә болса дунядики әң чоң дора ишләпчиқарғучи дөләт болған хитайдики дориханиларда зукам дорисиниңму қалмиғанлиқи ши җинпиң башчилиқидики һөкүмәтниң қайси дәриҗидә хәлқни алдап келиватқанлиқини бәкму рошән көрситип бәргән. Аптор мушу әһвалларни омумлаштуруп “буларниң һәммиси ши җинпиңниң хитайда яки дуня алдида һечқанчә абруйи қалмиғанлиқини, бу абройни қайта тикләшниңму мумкин әмәсликини намаян қилип бериду” дәйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.