“Muhapizetchi” géziti:“Shi jinping belkim wabadin ötelmesliki mumkin!”

Xitay hökümiti taki yéqinqi mezgillerge qeder özliri qattiq qolluq bilen ijra qilip kelgen “Wirus yuqumini nölge chüshürüsh” siyasitini sotsiyalizm tüzümining, shuningdek xitay kompartiyesining qandaq “Ewzel” we“Dana” ikenlikige ispat qilip kelgenidi. Emma xitaydiki wirus yuqumining shiddet bilen örlishi keltürüp chiqarghan ré'alliq xitay re'isi shi jinpingni “Biz téximu köp tirishchanliq bilen wirusqa qarshi bir meydan keskin küreshke teyyarlinishimiz lazim” déyishke mejbur qildi. En'gliyediki “Muhapizetchi” géziti bu ehwallarni omumlashturup “Shi jinpingning dölet ichidiki abroyila emes, dunya aldidiki obrazimu mushu qétimliq wirus wabasida halak bolushi mumkin” dégen.

Isabél xilton (Isabel Hilton) imzasida 1-yanwar küni élan qilin'ghan obzorda éytilishiche, nöwette türlük uchur yolliridin we ijtima'iy taratqulardin melum boluwatqan xewerler xitaydiki wirus wabasining qanchilik dehshetlik boluwatqanliqini namayan qilmaqta iken. Emma xitay hökümiti izchil wirustin kélip chiqqan ölüm sanini, bir qisim yaman niyetlik kishilerning ösek söz tarqitiwatqanliqini tekitleshke ötken. Shuningdek wirus wabasining qayta yamrishi mentiqige uyghun ikenlikini, buning emeliyette éghirraq zukamdin perq qilmaydighan hadise ikenlikini, xitay tébabitining buni dawalap kételeydighanliqini qayta-qayta tilgha alghan. Bu hal ularning üch yil ilgiri wirus wabasi bashlan'ghan mezgillerdiki “Hemme ishlar yaxshi méngiwatidu” dégendek yalghanliridin qilche perq qilmaydiken.

Obzorda éytilishiche, gerche xitay xelqi “Kompartiye aqni <qara> dése shuninggha ishinish” ke adetlen'gen bolsimu ötken üch yilliq qamalda ünümlük waksina barliqqa kelmeslik, teshwiqat bilen ré'alliq arisidiki ghayet zor perq dégenler xitay xelqining taqitini bir yerge aparghan. Ene shu sewebtin ürümchi shehiridiki ot apitidin kéyin xitay miqyasida hökümetning wabani kontrol qilish siyasitige qarshi namayishlar otturigha chiqqan. Emdilikte bolsa dunyadiki eng chong dora ishlepchiqarghuchi dölet bolghan xitaydiki dorixanilarda zukam dorisiningmu qalmighanliqi shi jinping bashchiliqidiki hökümetning qaysi derijide xelqni aldap kéliwatqanliqini bekmu roshen körsitip bergen. Aptor mushu ehwallarni omumlashturup “Bularning hemmisi shi jinpingning xitayda yaki dunya aldida héchqanche abruyi qalmighanliqini, bu abroyni qayta tikleshningmu mumkin emeslikini namayan qilip béridu” deydu.