Бейҗиңда йүз бәргән ши җинпиңға қарши шоар есиш вәқәси күчлүк ғолғула қозғиған

10-Айниң 13-күни бейҗиңниң әң ават өтүшмә көврүклиридин биригә ши җинпиңға қарши шоар есилғандин кейин хитайниң ичи вә сиртида күчлүк инкас пәйда болған.

Тивиттер қатарлиқ иҗтимаий алақә васитилиридә бу һәқтә көплигән учурлар тарқалған, хәлқара таратқуларму “алаһидә вақит, алаһидә орунда йүз бәргән бу вәқә” гә аит хәвәр-мулаһизиләрни елан қилған.

Әнглийәдики “муһапизәтчи” ториниң бу һәқтә бәргән хәвиридә ейтилишичә, ши җинпиң қайта һакимийәт бешиға чиқимән дәватқанда, қурултай вәкиллири йиғилған бейҗиңда униңға қарши шоарниң есилиши пәвқуладдә әһмийәткә игә вәқә икән. Хитай тор сақчилири кәң көләмлик һәрикәткә келип, барлиқ учурларни өчүрүп ташлиған вә уни тарқатқанларниң һесабини тақиған.

Хитай паалийәтчилириниң тивиттердики учурлиридин мәлум болушичә, көврүккә шоар есип тутулған адәм пең лифа исимлик бир хизмәтчи болуп, бу йил 48 яшқа киргәникән. У ишчи қияпитидә ясинип көврүккә чиқип лозункини асқан вә ши җинпиңға қарши шоар товлиған, диққәтни қозғаш үчүн көврүккә ис қоюп бәргән. Хитай сақчилири дәрһал келип уни тутуп кәткән. Бу вәқә хәлқаралиқ вәқәгә айлинип кәткәнлики үчүн, хитай һөкүмити уни муддәтсиз қамаққа яки өлүмгә һөкүм қилиши мумкин икән.

Бу вәқәдин кейин, бейҗиң шәһәрлик һөкүмәт җиддий тәдбир қоллинип, һәр бир көврүккә қарайдиған адәм қойған вә иш һәққини 280 йүәндин 320 йүәнгичә бекиткән.