Яш иҗтимаий пән хадимлириниң каллисини «ши җинпиң идийиси билән қоралландуруш» тәләп қилинди

Мухбиримиз үмидвар
2017-12-17
Елхәт
Пикир
Share
Принт

Хитай коммунист даирилири уйғур дияридики яш иҗтимаий пән тәтқиқатчилириниң «каллисини ши җинпиң идийиси билән қоралландуруп», уйғур районини идарә қилиштики «күчлүк сиясий капаләтчи вә әқли қоллиғучи болуши» ни тәләп қилди.

Чен чүәнго башчилиқидики уйғур аптоном районлуқ коммунистик партийә даимий комитети вә тәшвиқат бөлүми 16-декабир күни үрүмчидики шинҗаң университетида ачқан яш иҗтимаий пән тәтқиқатчилири мунбири паалийитидә бу тәләпни тәкитлигән.

Тәңритағ ториниң хәвиридин мәлум болушичә, йиғин бирдәк һалда һәр милләт яш иҗтимаий пән хадимлирини «шинҗаңниң иҗтимаий муқимлиқи вә әбәдий әминликини әмәлгә ашуруштин ибарәт баш нишандики күчлүк күч болуш» қа чақирған.

Йиғинда 280 парчә мақалә оқулған болуп, гәрчә бу мақалиләрниң кәспи вә мәзмун даириси ахбаратқа айдиң болмисиму, әмма бу хилдики йиғинлардин хәвәрдар бир уйғур иҗтимаий пән тәтқиқатчисиниң ейтишичә, мутләқ көп қисим мақалиләрниң муқимлиқни қоғдаш, идеологийә саһәсидики бөлгүнчиликкә зәрбә бериш вә ши җинпиң идийиси тәшвиқати темиси қатарлиқларға мәркәзләшкәнлики рошән.

Чен чүәнго уйғур аптоном райони партком секретарлиқ вәзиписигә тәйинләнгәндин буян, уйғур диярида «муқимлиқни қоғдаш», «икки йүзлимичиликкә зәрбә бериш» намидики сиясий һәрикәтләрни күчәйткән болуп, буниң ичидә идеологийә саһәсиниң әң муһим зәрбә бериш саһәси болғанлиқи инкаслар вә хәвәрләрдин мәлум болмақта. Хитай даирилири уйғур дияри тарихи, мәдәнийити, уйғур әдәбияти, иҗтимаий-иқтисадий тәрәққияти тарихи мәсилилиригә қарита сензорни күчәйтип, илгири нәшр қилинип тарқитилған бир қисим тарихи әслимиләр, романлар вә башқиларни йиғивелиш, қуран вә башқа дини мәзмундики китабларни йиғиш һәм чәк қоюш паалийәтлири елип барған. 

Америкидики мәзкур уйғур зиялийсиниң ейтишичә, иҗтимаий пән вә әдәбият сәнәт саһәсидики бир қисим тонулған уйғур зиялийлири, әдиблири, шаирлири, сәнәткарлири, мәсилән даңлиқ нахшичи абдуреһим һейт вә башқилар назарәт һәм қамаққа елинған. Мәлум болушичә, нөвәттә хитай даирилири йәнә уйғурлар арисидики аталмиш кона тәшвиқат - «пантүркизм вә пан исламизм» ға қарши күрәш қилишни қайтидин күчәйтмәктә икән.

Пикирләр (0)
Share
Толуқ бәт