Éyan graxam: “Xitayning shimaliy koréye bolghan qattiq pozitsiyesi amérikani gollash üchün boluwatidu”

Muxbirimiz shöhret hoshur
2017.11.29

Shimali koréye bügün qit'eler ara uzun musapilik bashqurulidighan bomba siniqi élip barghandin kéyin, xelq'ara jem'iyetning diqqiti yene bir qétim xitayning mezkur weqediki pozitsiyesige merkezleshti.

Xitay tashqi ishlar ministirliqining bayanatchisi géng shu'ang bügün bayanat bérip, xitayning shimaliy koréyeni “Qattiq eyipleydighanliqi” ni bildürgen we shimaliy koréyeni b d t ning alaqidar qararlirigha boysunushqa chaqirghan.

Bezi közetküchiler, xitayning amérikaning rayigha béqip shimaliy koréyege qarita qattiqraq pozitsiyede inkas qayturuwatqan bolsimu, emma uning shimaliy koréye mesilisidiki istratégiyelik pilanida özgirish bolmighanliqini ilgiri sürmekte. Awstraliyelik mutexesish éyan graxam bügün “Washin'gton pochtisi” gézitide maqale élan qilip, xitayning yéqinda xitay hawa yolliri shirkitining shimaliy koréyege uchushini bikar qilishi we ikki dölet arisidiki dendung köwrüki qurulushini qismen toxtitishi, “Peqetla washin'gitonni bezlesh üchün, xalas!” dégen.

Éyan graxamning mezkur maqaliside yene shimali koréyening xitay kompartiyesi béyjingda 19‏-qurultay échiliwatqan mezgilide bir mehel jim turghanliqini, qurultaydin kéyin shi jinpingning shimaliy koréyege wekil ewetkenlikini eslep ötken.

Xitayning “Yer shari waqti géziti” shimaliy koréyening bügün élip barghan qit'eler ara uchidighan bashqurulidighan bomba siniqini “Amérikaning shimaliy koréye siyasitidiki meghlubiyitining ipadisi,” dep körsetken. “Washin'gton pochtisi” géziti xitay taratqulirining bu inkasigha jawab qayturup, “Xitay kompartiyisi yuqiri qatlimidikilerning zéhniyitining ashkarilinishi,” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.