Xitay merkiziy hökümet wekilliri her qaysi jaylardiki pa'aliyetlirini dawamlashturmaqta

Muxbirimiz ümidwar
2015-09-30
Share

Xitay merkizi hökümitining siyasiy kéngesh re'isi yü jéngshéng bashchiliqidiki wekiller ömiki, Uyghur aptonom rayoni qurulghanliqining 60 yilliqini xatirilesh üchün guruppilargha bölinip, her qaysi wilayet, nahiye we yézilarda nuqtiliq ziyaret pa'aliyetlirini dawamlashturmaqta.

Xitay merkiziy hökümitining mexsus "Shinjang xizmiti" ge mes'ul qilin'ghan siyasiy byuro da'imiy hey'et ezasi yü jéngshén we mu'awin bash ministir lyu yendung qatarliqlar, Uyghur élining jenubidiki Uyghurlar zich jaylashqan hemde ilgiri bir qatar toqunush weqeliri yüz bérip, muqimsiz rayonlar dep qariliwatqan qeshqer, xoten, aqsu qatarliq wilayetlerdiki ziyaretlirini axirlashturup, 29-, 30-séntebir künliri Uyghur élining shimaldiki ili we altaylarda asasliqi qazaqlar bilen uchrishishlar élip barghan.

Shinxu'a torining süretlik xewerliridin melum bolushiche, lyu yendung aptonom rayon re'isi shöhret zakirning hemrahliqida ghulja shehiridiki xenbing yézisi qatarliq jaylarda ziyarette bolghan. Yü jéngshéng altayda ziyarette bolghanda uninggha qazaqlarning milliy toni we qazaq qalpiqi kiydürülgen. Uning qazaqche kiyinip, qazaq charwichi balilirini qolliridin yétilep turghan xushal-xuram keypiyati teshwiqat obyékti qilin'ghan.

Nöwette, Uyghur élida Uyghur aptonom rayoni qurulghanliqining 60 yilliqi we bu 60 yilda alemshumul özgirishler we tereqqiyatlar emelge ashurulghanliqi téma qilin'ghan teshwiqat we xatirilesh pa'aliyetliri keng kölemde élip bérilmaqta. Biraq, chet'ellerdiki Uyghur teshkilatliri bolsa, xitay xelq jumhuriyiti we Uyghur aptonom rayoni qurulghan 10-ayning birinchi künini Uyghurlarning "Matem küni" qilip békitip, naraziliq namayishi we bashqa her xil pa'aliyetliri élip barmaqta. 30-Séntebir küni amérika paytexti washin'gtondiki xitay elchixanisi aldida Uyghurlarning bu xildiki naraziliq namayishi ötküzüldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet