Xitayning “Shinjang xizmiti yighini” diki meqsedliri ashkara tilgha élinishqa bashlidi

Muxbirimiz eziz
2021.10.06

Uyghur diyaridiki omumiy siyasiy weziyetni békitküchi bash “Rézhissor” ning kimliki aydinglishiwatqanda, xitay hökümitining bu xil weziyetni royapqa chiqirishidiki barliq yétekchi idiyelerning emeliyette üch qétimliq “Shinjang xizmiti söhbet yighini” jeryanida tepsiliy muhakime qilinip békitilgenlikimu melum bolushqa bashlidi.

Xitay hökümiti bashqurishidiki “Tengritagh” tori 6-öktebirge qeder “‛üchinchi nöwetlik shinjang xizmiti söhbet yighini‚ heqqidiki bayanlar” mawzusida bir yürüsh chatma xewerlerni élan qilghan bolup, bularning merkiziy idiyesi süpitide “Shinjang xizmitini yaxshi ishleshning achquchi partiyede. Üchinchi nöwetlik shinjang xizmiti yighinida bash sékrétar shi jinping ‛partiyening shinjang xizmitige bolghan rehberlikini kücheytishte ching turush‚ ni alahide tekitligen” déyilgen. Xewerde bu xildiki “Partiye hemmige mutleq igidarchiliq qilish” ning Uyghur diyaridiki ijtima'iy muqimliq we uzun mezgillik eminlikning bash qiblinamisi ikenliki, partiye qurulushi we partiyiwi kadirlar qoshuni arqiliq muqimliqni qoghdash, bölgünchilikke qarshi turushning “Mustehkem qel'eliri” ni berpa qilish alahide tilgha élin'ghan.

Xewerde alahide yer alghan bir nuqta nöwette Uyghur diyaridiki eng mukemmel étiqad sistémisi toghriliq toxtilip: “Kompartiyening meniwi tüwrüki we syasiy rohini bash étiqad qilghanda, barche ishta utuq qazinalaymiz” dep xulase chiqirilghan. Shuningdek kompartiye bayriqini “Her bir komunist bir bayraq, her bir kent bir mustehkem baza” bolghan “Istihkam” larda lepilditish chaqiriqi otturigha qoyulghan.

Amérikadiki musteqil analizchi ilshat hesen bu heqte toxtilip, buning emeliyette xitay hökümitining Uyghur diyaridiki bir qétimliq “Étiqad yenggüshlesh urunushi” ikenlikini bildürdi. Shundaqla buning nöwettiki irqiy qirghinchiliqning nezeriyiwi asasining bir qismi ikenlikini tekitlep: “Xitay kompartiyesi mushu arqiliq komunizim étiqadini sherqiy türkistandiki yétekchi étiqad aylandurmaqchi boluwatidu. Buning mahiyette bundin kéyinki weziyetning mushu yolyoruq asasida téximu chong zulmetke qarap mangidighanliqining bishariti,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.