йеқинда бейҗиңда ечилған "үчинчи қетимлиқ шинҗаң хизмити йиғини" да хитай рәиси ши җинпиң "өткән бир нәччә йилда шинҗаңдики хизмәтләр зор утуққа еришти. бундин кейин бу хизмәт изчил давам қилиду" дегән мәзмунда хуласә чиқарғаниди. әмдиликтә бу йиғинниң роһини үрүмчидин хотәнниң әң чәт йезилириғичә йәткүзүш бир түрлүк сиясий вәзипә сүпитидә башланған.
"тәңритағ тори" ниң 13-өктәбирдики хәвиридә ейтилишичә, үрүмчидә мәзкур йиғинниң роһини тәшвиқ қилиш чоң йиғини ечилған. йиғинда ши җинпиңниң "шинҗаң хизмити һәққидики йолйоруқлирини тәврәнмәстин иҗра қилиш" һәмдә шу арқилиқ узақ мәзгиллик әминликни әмәлгә ашуруш чақириқи оттуриға қоюлған. шундақла буниң бир түрлүк муһим сиясий вәзипә икәнлики тәкитләнгән.
муһаҗирәттики анализчилар бу һәқтә пикир қилип, ши җинпиңниң нөвәттә уйғурлар диярида иҗра болуватқан барлиқ тәдбирләрни муәййәнләштүрүш һәққидики тәшвиқатни йезиларғичә омумлаштуруш һәрикити маһийәттә төвәндики авам пуқраларға буниңдин кейин иҗра болидиған техиму қаттиқ контроллуқ тәдбирлиригә мутләқ итаәт қилишни буйруғанлиқ, деди. шуниңдәк буниң обекти әмәлийәттә йәнила лагер тешидики уйғурлар болидиғанлиқини әскәртти.
