Shiwétsiye Uyghur jem'iyiti xitay kompartiyesi qurulghanliqining 103 yilliqini lenetlidi

1-Iyul, xitay kompartiyesi qurulghanliqining 103-yilliqi künide, shiwétsiye Uyghur jem'iyiti ijtima'iy taratqularda uchur yollap, kommunist xitay Uyghur diyarini ishghal qilghandin buyan élip barghan heddi-hésabsiz jinayetliri, jümlidin yéqinqi yillarda yürgüzüp kéliwatqan irqiy qirghinchiliq jinayetlirini qattiq eyibligen.

“Asiya xelq'ara xewerliri” torining 1-iyul küni bergen xewirige qarighanda, shiwétsiye Uyghur jem'iyiti X de élan qilghan uchurida mundaq dégen: “Xitay kompartiyesining 103 yilliqi künide ularning qanliq jinayetlirini—wehshiyane tajawuzchiliqi hemde uningdin kéyin Uyghurlar we bashqa türkiy xelqlerge yürgüzüp kéliwatqan irqiy qirghinchiliq jinayetlirini untumasliq kérek”.

Shiwétsiye Uyghur jem'iyiti bu uchurida, xitay kompartiyesining Uyghur qatarliq milletlerdin milyonlighan insanlarni tutqun qilip, ularni qiynash, öltürüsh, ichki ezalirini oghrilash, basqunchiliq qilish, mejburiy emgekke sélish qatarliq qebih jinayetlerni dawamliq sadir qiliwatqanliqini qattiq eyibligen؛ shundaqla xitay kompartiyesi qurulghanliqining 103 yilliqini her qandaq shekilde tebrikleshke bolmaydighanliqini, belki qurulghandin buyan insaniyetke apet bolghan bu qebih guruhning hélihem Uyghurlargha qorqunchluq zulum séliwatqanliqini, uninggha süküt qiliwatqan döletlerning bu jinayetke ortaq boluwatqanliqini eskertip ötken.