Sin'gapordiki asiya bixeterlik yighinini amérika-xitay otturisidiki jiddiylik igilidi

Yilda bir qétim sin'gaporda ötküzülidighan “Shangrila di'alogi” namliq asiya bixeterlik yighini 2-iyun küni amérika-xitay munasiwetliri keskinliship ketken bir shara'itta bashlandi. Chet'el taratqulirining xewerliride, yighinda amérika-xitay otturisidiki jiddiychilikning eks étidighanliqi bildürülmekte. Ikki kün dawamlishidighan bu yighin'gha 49 döletning mudapi'e ministirliri, yuqiri derijilik herbiy emeldarliri, diplomatliri, qoral-yaragh karxanilirining mes'ulliri we bixeterlik mutexessisliri ishtirak qilidu. Yighin'gha amérika dölet mudapi'e ministiri liloyid a'ustén bilen xitay dölet mudapi'e ministiri li shangfuningmu qatnishidighanliqi melum.

Lékin roytérs agéntliqining bildürüshiche, yighin'gha bu ikkiylen ishtirak qilsimu, lékin bu yighin xitay amérikaning ikki dölet mudapi'e ministirlirining söhbitini ötküzüsh telipini ret qilghan bir shara'itta ötküzülmektiken.

‍Amérika dölet mudapi'e ministirliqi bu heptining bashliri xitay amérikining ikki dölet mudapi'e ministirlirining uchrishish teklipini ret qilghanliqini élan qilghan. Amérika hökümiti 2018-yili xitayning hazirqi dölet mudapi'e ministiri li shangfugha émbargo yürgüzgen. Li shangfu eyni waqitta xitay armiyesining qoral-yaragh ishlirigha mes'ul emeldari idi. Melum bolushiche, xitay amérikaning li shangfugha yürgüzülgen émbargoni bikar qilmay turup, körüshüshni qobul qilmaydighanliqidin bésharet bergen.

Liloyd ustén bu hepte yaponiye dölet mudapi'e ministiri yasukazu bilen körüshkende xitayning körüshüshni ret qilghanliqidin epsuslan'ghanliqini éytqan. Liloyid a'usténning li shangfu bilen körüshüshni telep qilishigha ötken ayning axirliri jenubiy déngizda xitay küreshchi ayropilanining bir amérika ayropilanigha kashila qilishi seweb bolghanliqi, liloyd a'usténning yaponiye mudapi'e ministirigha xitay bu xil ighwagerchilikni toxtatmisa, “Melum nuqtida nahayiti téz kontroldin chiqip kétidighan hadise yüz bérishidin endishe qilidighanliqi” ni bildürgen.