Xitay hökümiti “Shinjangni medeniyet bilen ozuqlandurush” qurulushini téximu kücheytishke urunmaqta

Xitayche “Shinjang géziti” torining xewer qilishiche, 9-ayning 18-küni “7-Nöwetlik xitay-yawro'asiya körgezmisi xitay-chet el medeniyet körgezmisi heptiliki” ning échilish murasimi ötküzülgen.

Uyghur aptonom rayonluq partkomning mu'awin sékritari, teshwiqat bölümining bashliqi jang chünlin bu murasimda échilish nutuqi sözlep, “Xelq'ara medeniyet hemkarliqini ilgiri sürüp, shinjang hékayisini sözlesh, yéngi dewrdiki shinjangning obrazini namayen qilish” ni telep qilghan.

Xitay taratquliri bu pa'aliyetni teshwiq qilishqa küchewatqan bolup, xewerlerde birdek halda “Xitay-chet el medeniyet heptiliki” xitay-yawro asiya körgezmisidiki muhim medeniyet pa'aliyiti bolush süpiti bilen, Uyghur rayonining chet eller bilen bolidighan medeniyet alaqisidiki muhim sehnisige aylandi” déyilgen.

Uningdin bashqa, 9-ayning 19-küni Uyghur aptonom rayoni bilen bingtu'en da'iriliri xitay dölet igilikidiki zijing medeniyet goruhi bilen istrtégiyelik hemkarliq kélishimi imzalap, “Shinjangni medeniyet bilen ozuqlandurush” qurulushini chongqurlashturushqa kirishken. Zijing medeniyet goruhi xitayning dölet igilikidiki yétekchi karxanisi bolup, metbu'at, kino-téliwiziye qatarliq sahelerni monupul qilishqa, xitay medeniyitini teshwiq qilishta bashlamchiliq rolini oynashqa bashlighan.

Kishilik hoquqni közitish teshkilatining aliy tetqiqatchisi maya wang “Shinjangni medeniyet arqiliq ozuqlandurush qurulushi” toghruluq qilghan sözide, “Xitay hökümitining atalmish ‛medeniyet qurulushi‚ Uyghurlarni ochuqtin ochuq xitaylashturush, bu emeliyette insaniyetke qarshi jinayet tüsini alghan” dégenidi. Buningdin qarighanda, xitayning “Xitay-chet el medeniyet heptiliki” ötküzüshi we dölet igilikidiki medeniyet guruhini Uyghur rayonigha teklip qilishi, xitayning bu rayonda öz medeniyitini mutleq üstünlükke ige qilish urunushlirini körsitip béridiken.