Уйғур дияридики сиясий бастурушниң техиму зор көләм алидиғанлиқи алға сүрүлмәктә

Мухбиримиз әзиз
2021-06-30
Share

Хитай һөкүмити башқурушидики "тәңритағ тори" ниң 30-июндики хәвиридә ейтилишичә, хитай һөкүмитиниң "мәмликәт бойичә сиясий қанун сепини тәртипкә селиш 16-мупәттиш гурупписи" уйғур диярида мәхсус пикир елиш йиғини ачқан. Бу йиғинға уйғур дияридики чен чүәнго, ваң җүнҗең, ваң миңшән қатарлиқ әң юқири дәриҗилик хитай әмәлдарлар толуқ қатнашқан.

Хәвәрдә ейтилишичә, мәркәздин кәлгән мупәттиш гурупписи "шинҗаңдики сиясий қанун сепини тәртипкә селишниң биринчи басқучи оңушлуқ орунланған. Иҗтимаий муқимлиқ вә узун мәзгиллик әминлик үчүн пухта асас селинған" дәп хуласә чиқарған. Шуниң билән биргә бундин кейинки хизмәтләр үчүн "муһим йип учи вә муһим делоларни бир яқлиқ қилишни күчәйтиш, җаһил вә тосқунлуқ пәйда қилғучи барлиқ амилларни үзүл-кесил тазилаш, сиясий қанун сепини техиму кеңәйтиш" дегәндәк вәзипиләрни орунлаш лазимлиқини тәкитлигән.

Уйғур аптоном райониниң партийә секретари чен чүәнго болса "партийә мәркизи комитетиниң йеңи дәврдики шинҗаңни идарә қилиш тәдбирини қәтий вә толуқ иҗра қилип, террорлуққа қарши туруш вә иҗтимаий муқимлиқ яритишқа зеһин қойидиғанлиқини" билдүргән.

Мәлум болушичә, уйғур дияридики сиясий бастурушни актип иҗра қилғучи күчләрниң бири болған уйғур аптоном районлуқ сиясий қанун комитетиниң мудири ваң миңшән әйни вақитта чен чүәнго қатарлиқ бирқисим хитай әмәлдарлири билән бирликтә америка һөкүмитиниң имбарго җазасиға учриғаниди. Америка һөкүмити бу һәқтики қарарда "бу кишиләр лагер системиси бәрпа қилиш һәмдә инсанийәткә қарши җинайәт садир қилиш билән әйиблинип имбаргоға учриди" дегәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт