Америка билән хитай "соғуқ мунасивәтләр уруши" ға кириватамду?

Мухбиримиз әзиз
2021-06-30
Share

Йеқинқи мәзгилләрдин буян америка билән хитай оттурисидики мунасивәтниң барғансери йириклишип меңиши икки тәрәп оттурисидики омумий алақини йеңидин башлиниватқан "соғуқ мунасивәтләр уруши" дәп тәсвирләшкә йүзләнмәктә. Болупму америка ташқий ишлар минситири антони билинкен өткән һәптә париж шәһридә "нйо-йорк вақти гезити" ниң зияритини қобул қилғанда "әркинлик дунясини хитайниң тәсиридин қоғдашта америка билән франсийә бир қейиқта үзиватиду," дегән.

CNN Агентлиқиниң бу һәқтики обзор мақалисида көрситилишичә, антони билинкен тилға алған бу мәсилә әмәлийәттә америка президенти җов байденниң "демократийә һазир еғир тәһдиткә дуч келиватиду" дегән агаһландурушиниң йәнә бир қетим тәкрарлинииши икән. Йәнә келип илгирики "соғуқ мунасивәтләр уруши" мәзгилидә америка билән сабиқ совет иттипақи идеологийәлик тоқунушни мәркәз қилған болса, хитай билән америка оттурисидики "соғуқ мунасивәтләр уруши" башқичә характердә ипадиләнмәктә икән. Болупму хитай рәиси ши җинпиң хитай компартийәси қурулғанлиқиниң 100 йиллиқини тәбрикләшкә алдираш билән биргә тинч окяндин һалқиған һалда зулум вә зомигәрликни ташқий дуняға кеңәйтиш билән мәшғул болмақта икән.

Обзорда көрситилишичә, гәрчә хитайниң дуня миқясида демократийәгә қарши уруш қозғиши намәлум болсиму, әмма хитай билән америка оттурисидики соғуқ мунасивәтләр урушиниң давам қилиши ениқ, дәп қаралмақта икән. Болупму ши җинпиңниң хитай милләтчилики хаһишини күчәп базарға селишиниң хитай компартийәсини сақлап қелиш һийлиси яки хитай һөкүмитиниң дуняға хоҗа болуш қара нийитиниң ашкарилиниши икәнлики һәққидә һазир көп хил пикирләр оттуриға чиқмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт