Uyghur élidiki her derijilik sot mehkimiliri sotchilirining almashturulushi diqqet qozghidi
2021.04.01
Bügün xitayning hökümet tor betliride Uyghur aptonom rayonluq xelq qurultiyi da'imiy komitétining wezipige teyinlesh-qaldurush isimliki élan qilindi.
Diqqet qozghaydighini, 3-ayning 25-küni Uyghur rayonluq 13-nöwetlik xelq qurultiyi da'imiy komitétining 24-qétimliq yighinida maqullan'ghan qarargha asasen, Uyghur aptonom rayonluq sot mehkimisidin tartip, herqaysi derijilik yerlik sot mehkimilirining eslidiki sotchiliri wezipidin qaldurulup, yéngi kishiler wezipige teyinlen'gen.
Edliye sahesidiki bu zor kölemlik wezipidin qaldurush we teyinlesh herikiti chet'ellerdiki Uyghur közetküchilerning küchlük diqqitini qozghidi.
Közetküchilerning qarishiche, xitay hökümiti Uyghur élida yürgüzüwatqan irqiy qirghinchiliqi sewebidin xelq'arada küchlük bésimgha duch kéliwatqan bir mezgilde bundaq zor kölemde wezipe almashturush qilishi guman qozghaydiken. Ular buning jinayetlerge a'it pakitlarni yoqitishni meqset qilghan bolushi mumkinlikini bildürüshti.
Uyghur aptonom rayonluq xelq qurultiyi da'imiy komitétining wezipige teyinlesh-qaldurush qararnamiside yene, ilgiri xoten wilayetlik partkom sékrétari, shinjang ishlepchiqirish-qurulush bingtu'eni 14-déwiziyesi partkomining 1-sékrétari qatarliq wezipilerni ötigen yang fasénning Uyghur aptonom rayonluq xelq hökümitining mu'awin re'islikige teyinlen'genlikimu uqturulghan.