Sowét ittipaqining ili inqilabigha a'it 1943-yilidiki mexpiy qararining in'glizche terjimisi élan qilindi

Muxbirimiz ümidwar
2016-11-20
Share


Amérikidiki wodrow wilson merkizi 1943-yili sowét kompartiyisi merkizi komitéti siyasi biyorosining 4-may küni otküzgen yighinda chiqarghan mexsus "Shinjang" mesilisi heqqidiki qararini ruschidin in'glizchigha terjime qilip élan qildi.

Stalin bashchiliqidiki sowét ittipaqi kompartiyisi merkizi komitéti siyasiy biyorosining 4-may küni Uyghurlar rayonidiki milliy azadliq herikitini qollash we yardem bérishke a'it mexpiy qararigha a'it mezkur mexpiy höjjet ötken esirning 90-yillirida sowét ittipaqi yimirilgendin kéyin rusiye alimliridin walériy barmin teripidin ashkarilinip, tetqiq qilin'ghan we bu mexpiy qarar 2000-yillardin kéyin Uyghur we xitay tarix sahesige ayding bolghan hemde bu heqtiki melumatlar radi'omiz teripidinmu tonushturulghan idi.

Bu qétim amérikidiki wodrow wilson alimlar merkizi 1934-1949-yilliri arisidiki sowét ittipaqining Uyghur diyarigha a'it bir qisim mexpiy höjjetlirini toplap, in'glizchigha terjime qilip élan qilghanda mezkur mexpiy höjjetning rusche esli nusxisining kopiyisi bilen in'glizche toluq terjimisini élan qilghan.

Sowét ittipaqi kompartiyisi siyasiy biyorosining mezkur qararida, shéng shiseyning sowét ittipaqidin yüz örigenlik qilmishigha qarita Uyghur, qazaq, qirghiz we mongghul qatarliq milletlerning shéng shiseyge qarshi milliy azadliq heriketlirini qollash we teshkillesh, mexpiy "Milli güllinish guruppiliri"ni qurush, milli azadliq heriketlirini qollash ishlirigha özbékistan, qazaqistan, qirghizistan ittipaqdash jumhuriyetliri kommunistik partiye sékértarliri we ministirlar kéngishi re'islirini mes'ul qilish, mexsus inqilabi teshwiqatlarni qanat yaydurush shuningdek yene sowét ittipaqi dölet bixeterlik komissariyatining qilishqa tégishlik ishliri hem bashqa bir qatar konkrét wezipiler belgilen'gen.

Bu mexpiy qarar 1944-1949-yilliri Uyghur diyarining ili, tarbaghatay we altay rayonida yüz bergen milli azadliq herikitining sowét ittipaqining qollishi we yardimige érishkenlikining pakiti hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet