Биританийә нефит ширкити BP билән Spotify уйғур мәҗбурий әмгикигә четишлиқ карбон киредити сетивалған

2023.11.13

Әнглийә вә голландийәдики таратқулар тәкшүрүш елип берип, биританийә нефит ширкити BP билән дигитал музика мулазими Spotify сетивалған карбон киредитиниң уйғур мәҗбурий әмгикигә четишлиқ икәнликини ениқлап чиққан. Доклатта қәйт қилинишичә, биританийә нефит ширкити билән Spotify сетивалған киредитниң келиш мәнбәси хитайниң уйғур районидики био-өсүмлүкни йеқилғу қилған бир електир истансисиниң карбон қурулуш түридин кәлгән икән. Бу әһвал “муһапизәтчи” гезити билән голландийәдики “пул” намлиқ бир дигитал учур тори бирликтә елип барған тәкшүрүштин мәлум болған.

  “муһапизәтчи” гезитиниң 13-ноябир күни хәвәр қилишичә, бу киредит дунядики әң чоң карбон мәслиһәтчилик ширкити болған “җәнубий қутуп” ширкити тәрипидин тәрәққий қилдурулған “бачу карбон қурулуш түри” йәни “маралбеши карбон қурулуш түри” дин елинған икән.

  “маралбеши карбон қурулуш түри” уйғур районидики био-өсүмлүкни йеқилғу қилған електир истансисини мәркәз қилған болуп, бу електир истансиси әтраптики кевәзликләрниң ғолини йеқилғу қилип електир ишләпчиқириш арқилиқ һаваға зәһәрлик карбон қоюп беришни кемәйтишни нишан қилған икән.

 Һалбуки, “җәнубий қутуп” ширкитиниң иҗраийә директори ренат һюбергер, бу қурулуш түриниң аяллар вә аз санлиқ милләтләргә ишқа орунлишиш имканийити яритидиғанлиқи, шундақла б д т ниң сиҗил тәрәққият пиланини қоллайдиғанлиқи, шуңа бу ширкәтләрниң алқишиға еришкәнликини ейтқан. Лекин хәвәрдә йәнә ренат һюбергерниң өткән җүмә күни вәзиписидин истепа бәргәнликиму тәкитләнгән.

 Хәвәрдә ейтилишичә, бу ширкәт өзиниң “маралбеши қутулуш түри” үчүн ишлигән еланида бу пиланға “йәрлик кевәз ғоли йиғидиған деһқанларниң қатнашқанлиқи, кевәз ғолиниң көйдүрүлүп тәбиий карбон енергийәси ишләпчиқиридиғанлиқини илгири сүргән.

Уйғур райони хитайниң асаслиқ пахта ишләпчиқириш базиси болуп, бу саһә уйғур мәҗбурий әмгики мәркәзләшкән саһәләрниң бири, дәп қаралмақта. Шуңа, америка һөкүмити уйғур районида ишләпчиқирилған “шинҗаң пахта мәһсулатлири” ни бирдәк чәклигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.