Biritaniye néfit shirkiti BP bilen Spotify Uyghur mejburiy emgikige chétishliq karbon kiréditi sétiwalghan

2023.11.13

En'gliye we gollandiyediki taratqular tekshürüsh élip bérip, biritaniye néfit shirkiti BP bilen digital muzika mulazimi Spotify sétiwalghan karbon kiréditining Uyghur mejburiy emgikige chétishliq ikenlikini éniqlap chiqqan. Doklatta qeyt qilinishiche, biritaniye néfit shirkiti bilen Spotify sétiwalghan kiréditning kélish menbesi xitayning Uyghur rayonidiki bi'o-ösümlükni yéqilghu qilghan bir éléktir istansisining karbon qurulush türidin kelgen iken. Bu ehwal “Muhapizetchi” géziti bilen gollandiyediki “Pul” namliq bir digital uchur tori birlikte élip barghan tekshürüshtin melum bolghan.

  “Muhapizetchi” gézitining 13-noyabir küni xewer qilishiche, bu kirédit dunyadiki eng chong karbon meslihetchilik shirkiti bolghan “Jenubiy qutup” shirkiti teripidin tereqqiy qildurulghan “Bachu karbon qurulush türi” yeni “Maralbéshi karbon qurulush türi” din élin'ghan iken.

  “Maralbéshi karbon qurulush türi” Uyghur rayonidiki bi'o-ösümlükni yéqilghu qilghan éléktir istansisini merkez qilghan bolup, bu éléktir istansisi etraptiki kéwezliklerning gholini yéqilghu qilip éléktir ishlepchiqirish arqiliq hawagha zeherlik karbon qoyup bérishni kémeytishni nishan qilghan iken.

 Halbuki, “Jenubiy qutup” shirkitining ijra'iye diréktori rénat hyubérgér, bu qurulush türining ayallar we az sanliq milletlerge ishqa orunlishish imkaniyiti yaritidighanliqi, shundaqla b d t ning sijil tereqqiyat pilanini qollaydighanliqi, shunga bu shirketlerning alqishigha érishkenlikini éytqan. Lékin xewerde yene rénat hyubérgérning ötken jüme küni wezipisidin istépa bergenlikimu tekitlen'gen.

 Xewerde éytilishiche, bu shirket özining “Maralbéshi qutulush türi” üchün ishligen élanida bu pilan'gha “Yerlik kéwez gholi yighidighan déhqanlarning qatnashqanliqi, kéwez gholining köydürülüp tebi'iy karbon énérgiyesi ishlepchiqiridighanliqini ilgiri sürgen.

Uyghur rayoni xitayning asasliq paxta ishlepchiqirish bazisi bolup, bu sahe Uyghur mejburiy emgiki merkezleshken sahelerning biri, dep qaralmaqta. Shunga, amérika hökümiti Uyghur rayonida ishlepchiqirilghan “Shinjang paxta mehsulatliri” ni birdek chekligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.