Artash su ambiri qurulushi heqqide türlük gumanlar otturigha chiqmaqta

Muxbirimiz eziz
2020.06.03

Xitay hökümiti yillardin buyan “Shinjangdiki senshya qurulushi” dep maxtap kelgen artash su ambiri qurulushining asasliq damba qurulushi besh yilliq qurulush arqiliq yéqinda pütken hemde tekshürüp ötküzüwélin'ghan.

“Tengritagh tori” ning 2-iyundiki xewiride éytilishiche, 11 milyard som (texminen 1. 7 Milyard amérika dolliri) meblegh sélin'ghan artash su ambiri qurulushi aqtu nahiyesining kosrab yézisi teweside bolup, zerepshan deryasining bash éqimigha sélin'ghan zor qurulush iken. Damba témining égizliki 164 métirgha yétidighan bu su ambiri heqqide xewerde “Bu su ambiri kelkünning aldini élish, sughirish we ékologiyelik muhitni qoghdashta muhim rol oynaydu,” déyilgen.

Halbuki, bu su ambirining zerepshan deryasining bash éqinini qaq otturidin boghup yasilishigha qarita muhajirettiki bir qisim analizchilar guman bilen qarawatqanliqi melum. Bolupmu buning yasilishidiki “Kelkünning aldini élip shinjanggha bext yaritish” teshwiqatini ret qilghuchilar buningdiki asasliq muddi'aning su menbesini kontrol qilish hemde tok chiqirip xitay ölkilirini qamdash ikenlikini algha sürmekte.

Amérikadiki musteqil közetküchi ilshat hesen bu toghrisida söz qilip: “Xitay kompartiyesi héchqachan Uyghurlargha paydiliq zor qurulushni qilip baqmighan. Bu qétimmu ular yenila özlirining istratégiyelik arzulirini chiqish nuqtisi qilghan,” dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.