Хитай һөкүмити уйғур елидики булғанған су мәнбәлирини әслигә кәлтүрүш үчүн «дәря башлиқи» тәйинлигән

Мухбиримиз ирадә
2018-03-20
Елхәт
Пикир
Share
Принт

Хитай һөкүмити йиллардин бери еғир бузғунчилиққа учрап қуруп кетишкә йүзлиниватқан тарим дәрясиниң сүйини әслигә кәлтүрүш үчүн 285 нәпәр дәря башлиқи тәйинлигән.

Шинхуа агентлиқи вә тәңритағ ториниң бу һәқтики хәвиридин қариғанда, бу дәря башлиқлири 2 район дәриҗилик, 19 вилайәт - област, 64шәһәр - наһийә вә 196 йеза - базар дәриҗилик дәря башлиқлиридин тәркиб тапқан болуп, дәря башлиқлири су булғинишниң алдини елиш, контрол қилиш хизмәтлирини ишләйдикән. Әгәр мәлум дәря башлиқиниң тәвәликидики судин мәсилә чиқса, мәсулийити сүрүштүрүлидикән.

Йеқиндин буян уйғур район даирилири уйғур елидики су мәнбәлирини қоғдаш вә толуқлаш хизмитигә алаһидә күч чиқармақта. Чәтәлләрдики нурғун көзәткүчиләр буни хитай һөкүмитиниң уйғур елигә йәниму көп көчмән йөткәшниң тәйярлиқ хизмити, дәп қаримақта. Уйғур елидики су мәнбәсиниң йиллардин буян еғир бузғунчилиқ сәвәбидин қуруп, чөллишишкә йүзлиниши хитай һөкүмитиниң уйғур елигә милйонлап хитай көчмән йөткәш арқилиқ уйғур елидә мәңгүлүк контроллуқни ишқа ашуруш пиланиға хирис пәйда қилған.

Шинхуа агентлиқи илгири тарқатқан бир хәвиридә, 1950-йилидин буян райондики байлиқ мәнбәлирини һәддидин зиядә ечиш вә ишлитиш сәвәбидин тарим дәрясиға тутушидиған алаһазәл 400 дәря еқини қуруп кәткәнлики. Узунлуқи икки миң километирдин артуқ болған тарим дәрясиниң төвән еқинлири қуруп вә қисқирап, һазир 1300 километир әтрапиға чүшүп қалғанлиқини. Йәр асти сүйи көрүнәрлик төвәнләп, зор миқдардики тоғрақлиқларни қум бесип кәткәнликини баян қилған иди.

Тәңритағ ториниң бүгүнки хәвиридин қариғанда, уйғур район даирилири су байлиқи мәнбәлирини қоғдаш, су булғинишиниң алдини елиш вә уни түзәш, су муһитини түзәш қатарлиқ хизмәтләрни күчлүк капаләткә игә қилиш үчүн уйғур елидики 3481 дәряниң һәммисигә дәриҗә, бөләккә бөлүп, дәря башлиқи бекиткән. Буниң билән уйғур елидики һәммә дәряниң бирдин башлиқи болған.

Пикирләр (0)
Share
Толуқ бәт