Xitay hökümiti Uyghur élidiki bulghan'ghan su menbelirini eslige keltürüsh üchün “Derya bashliqi” teyinligen

Muxbirimiz irade
2018.03.20

Xitay hökümiti yillardin béri éghir buzghunchiliqqa uchrap qurup kétishke yüzliniwatqan tarim deryasining süyini eslige keltürüsh üchün 285 neper derya bashliqi teyinligen.

Shinxu'a agéntliqi we tengritagh torining bu heqtiki xewiridin qarighanda, bu derya bashliqliri 2 rayon derijilik, 19 wilayet - oblast, 64sheher - nahiye we 196 yéza - bazar derijilik derya bashliqliridin terkib tapqan bolup, derya bashliqliri su bulghinishning aldini élish, kontrol qilish xizmetlirini ishleydiken. Eger melum derya bashliqining tewelikidiki sudin mesile chiqsa, mes'uliyiti sürüshtürülidiken.

Yéqindin buyan Uyghur rayon da'iriliri Uyghur élidiki su menbelirini qoghdash we toluqlash xizmitige alahide küch chiqarmaqta. Chet'ellerdiki nurghun közetküchiler buni xitay hökümitining Uyghur élige yenimu köp köchmen yötkeshning teyyarliq xizmiti, dep qarimaqta. Uyghur élidiki su menbesining yillardin buyan éghir buzghunchiliq sewebidin qurup, chöllishishke yüzlinishi xitay hökümitining Uyghur élige milyonlap xitay köchmen yötkesh arqiliq Uyghur élide menggülük kontrolluqni ishqa ashurush pilanigha xiris peyda qilghan.

Shinxu'a agéntliqi ilgiri tarqatqan bir xewiride, 1950-yilidin buyan rayondiki bayliq menbelirini heddidin ziyade échish we ishlitish sewebidin tarim deryasigha tutushidighan alahazel 400 derya éqini qurup ketkenliki. Uzunluqi ikki ming kilométirdin artuq bolghan tarim deryasining töwen éqinliri qurup we qisqirap, hazir 1300 kilométir etrapigha chüshüp qalghanliqini. Yer asti süyi körünerlik töwenlep, zor miqdardiki toghraqliqlarni qum bésip ketkenlikini bayan qilghan idi.

Tengritagh torining bügünki xewiridin qarighanda, Uyghur rayon da'iriliri su bayliqi menbelirini qoghdash, su bulghinishining aldini élish we uni tüzesh, su muhitini tüzesh qatarliq xizmetlerni küchlük kapaletke ige qilish üchün Uyghur élidiki 3481 deryaning hemmisige derije, bölekke bölüp, derya bashliqi békitken. Buning bilen Uyghur élidiki hemme deryaning birdin bashliqi bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.