Xitay inzhénérliri tibettin Uyghur éligha su bashlap kélishni sinaq qilmaqtiken

Muxbirimiz erkin
2017-10-30
Élxet
Pikir
Share
Print

Xitay inzhénérliri 1000 kilométirliq tonil qézip, tibettin Uyghur élining teklimakan rayonigha su bashlap kélishni sinaq qilmaqtiken. Bezi xitay inzhénérliri bu pilanning sinaq qiliniwatqanliqini xongkong "Jenubiy xitay seher pochta géziti" ge ashkarilighan.

Mezkur gézitning yekshenbe küni xewer qilishiche, bu sinaqqa ishtirak qiliwatqan bir xitay gé'o-téxnika inzhénéri, eger bu pilan ishqa ashsa, u "Shinjangni kaliforniyege aylanduridu" dégen.

Tibettin teklimakan'gha su bashlash pilani bu yéqinda otturigha qoyulghan emes. U buningdin xéli yillar awwal bezi xitay mutexessisliri teripidin otturigha qoyulghan bolsimu, biraq bu pilan Uyghur teshkilatliri, muhit qoghdighuchiliri we hindistan terepning naraziliqigha uchrighan.

Uyghur teshkilatliri bu pilan teklimakan etrapidiki bostanliqlarning su mesilisini hel qilishqa yardem qilsimu, biraq bu xitayning bu rayonlargha téximu köp köchmenlerni orunlashturup, Uyghurlarning turmush, medeniyet xasliqigha téximu éghir buzghunchiliq qilidighanliqini agahlandurup kelgen.

Xitay inzhénérlirining bildürüshiche, tibet-teklimakan su tonili qurulushi hazir xitayning guyju bilen yünnen ölkisi arisida yasiliwatqan su tonili qurulushining muweppeqiyetlik bolush-bolmasliqigha baghliqken.

Bir xitay inzhénéri bu qurulush tibet-teklimakan su qanili üchün téxnika, layihelesh métodi we eslihe qatarliq jehetlerde zörür tejribe bilen teminleydighanliqini bildürgen.
Biraq, "Jenubiy xitay seher pochta géziti" xewiride, bu pilanning aldida zor tosqunluqlar barliqini, uning meblegh, qoshna döletlerning naraziliqi, layihelesh jehettiki qiyinchiliq, muhitqa bolghan tesiri qatarliq xirislargha duch kélidighanliqini bildürgen.

Toluq bet