Sükütni buzush dawam qilmaqta

Muxbirimiz jewlan
2021-04-21
Share

Yillardin béri tutqun qilin'ghan yéqinliridin xewer alalmay kéliwatqan chet eldiki Uyghurlarning guwahliq bérish pa'aliyetliri izchil dawamliship kéliwatqan bolup, yéqinda awstraliyede yashawatqan xanim méhray xanim yoldishi mirzat tahir heqqide guwahliq bergen.

Awstraliye ABCxewerliri torining xewer qilishiche, awstraliyede tughulup chong bolghan méhray 2016-yil öz diyarini ziyaret qilghili barghanda mirzat bilen tonushup toy qilghan. 2017-Yilning béshida, méhray xanim yoldishining wizisining chiqishini saqlawatqan künlerde ürümchide tutush we qamashlar bashlinip ketken. Ular ürümchidin derhal ayrilish qararigha kélip, 12-aprél awstraliye mélborn'gha uchidighan bélet zakas qilghan, emma saqchilar 10-aprél ishikni chékip kirip mirzaning pasportini tartiwalghan. Xitay saqchiliri mirzatning ilgiri türkiyege chiqqanliqini bahane qilip uni lagérgha solighan. Méhray xanimning wiza waqti toshup qélip awstraliyege qaytip ketken. 2019-Yil 22-aprélda mirzat lagérdin qoyup bérilgen, méhray xanim uning bilen ürümchi ayrodromida körüshken, emma uzun ötmey mirzat qayta tutqun qilinip lagérgha élip kétilgen. Méhray xanim yene awstraliyege qaytip kélishke mejbur bolghan we uning bixeterlikidin ensirep süküt qilip kelgen. Emma ikki hepte ilgiri yoldishining 25 yilliq qamaq jazasigha höküm qilin'ghanliqini anglap qattiq azablan'ghan.

Xewerde éytilishiche, xitay da'iriliri mirzat tahirni türkiyede turghanliqi üchün "Bölgünchi" dégen betnam bilen eyblep qamaq jazasigha höküm qilghan. Sükütning héchnersige yarimighanliqini bilgen méhray xanim ABC qanilining ziyaritini qobul qilip, özi bilidighan ehwallarni ashkarilighan we awstraliye hökümitidin érini qutuldurup chiqishqa yardem qilishni telep qilghan. Awstraliyediki kishilik hoquq organliri we taratqular hazir méhray xanimning bu kechürmishi we guwahliqini xitayning insaniyetke qarshi jinayitige yene bir küchlük delil bolalaydu dep qarap, uninggha jiddiy mu'amile qilmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet