Түркийә сүрийә чегриси ичидики сулайман шаһ қәбрисини көчүрүш һәрбий һәрикити елип барди

Мухбиримиз үмидвар
2015-02-22
Елхәт
Пикир
Share
Принт


Түркийә қошун әвәтип сүрийә чегриси ичидики османли империйисиниң асасчиси сулайман шаһниң қәбрисини йөткигән болуп, бу хәвәр дуня мәтбуатлириниң қизиқ темисиға айланди.

Америка авазиниң хәвәр қилишичә,сүрийә түркийә тәрәпниң қәбрини вә бу йәрдики қаравуллирини йөткәш һәрикитини «ашкара таҗавузчилиқ» дәп әйибилигән.

Ройтерс агентлиқиниң йезишичә, түркийә баш министири давут оғлу түркийә қошуниниң сулайман шаһниң қәбрисини вә қәбирини қоғдаватқан 40 нәпәр һәрбий хадимни башқа бихәтәр җайға йөткәп кәткәнликини билдүрди. Бу һәрикәтни ишқа ашурушқа 572 нәпәр һәрбий хадим қатнаштурулған.

Түркийә трт радиосиниң хәвәр қилишичә, түркийә һөкүмити тәрәп бу қәбрини йөткәйдиған һәрбий хадимлар үчүн 50 танка аҗратқан вә күрәшчи айропилан чиқирип, чарлаш елип барған.

Түркийә тәрәп мәзкур қәбрә йөткәш һәрбий һәрикитиниң мувәппәқийәтлик вә хәлқара қанунларға уйғун болғанлиқини билдүргән, мәзкур һәрбий һәрикәт 21 - феврал башлинип,22 - феврал күни мувәппәқийәтлик орундалған.

Мәзкур қәбригә йеқин районларда куртлар қошуни билән ислам дөлити арисида тоқунушлар давамлашмақта иди.

Сулайман шаһ, османли империйәсиниң қурғучиси, вә биринчи падишаһи осман ғазиниң бовиси болуп, у,1178—1227 - йиллири арисида яшап вапат болған. 1921 - Йили әнқәрә һөкүмити билә франсийә һөкүмити келишим түзгәндә мәзкур қәбрә бар җай түркийә земини сүптидә етирап қилинған. 1923 - Йили, қәбрә бар җайда байрақ чиқириш вә қәбрини мәхсус һөрмәт қаравуллири билән қоғдаш салаһийити берилгән иди.

Пикирләр (0)
Share
Толуқ бәт