Süriyediki bombardimandin qutquzuwélin'ghan 5 yashliq omran özi bilen teng yashtiki Uyghur balilirining paji'elirini eske salmaqta

Muxbirimiz qutlan
2016-08-20
Élxet
Pikir
Share
Print


17 - Awghust küni süriyening aléppo shehiridiki shiddetlik bombardimanda yarilan'ghan 5 yashliq ösmür omran qan arilash topa - tozan ichidin qutquzuwélindi. Uning qutquzush aptomobilidiki bichare haliti dunyawi taratqularda körsitilip, milyonlighan insanlarning yürek - baghrini ezdi shundaqla süriyediki urush krizisining bir qanliq simwoligha aylandi.

Birleshken döletler teshkilati ösmürler fondi jem'iyitining ijra'iye diréktori antoniy lek, süriyede 5 yashliq omran'gha oxshash 100 mingdin artuq kichik balining urushning échinishliq azabini tartiwatqanliqini ilgiri sürdi.

Pütün dunya 5 yashliq omran we uning a'ilisining paji'esidin epsusluqqa chömgen minutlarda, Uyghur ösmürliri duch kéliwatqan éghir qismetlermu buninggha roshen sélishturma hasil qilmaqta.

Radiyomiz 2013 - yili 8 - ayning 12 - küni, yeni rozi héytning harpa künide aqsuning ayköl yézisida xetne qur'an qiliwatqan Uyghur ahaliliri bilen bilen xitay saqchiliri arisida yüz bergen qanliq toqunushni dunyagha ashkara qilghan idi.

Igilinishiche, xitay saqchiliri keltürüp chiqarghan mezkur weqede Uyghur ayalliridin bir nepiri ölüp, 4 nepiri yarilan'ghan. Oq tégip yarilan'ghanlar ichide emdila 4 yashqa kirgen Uyghur qiz sübhinur memetmu bar idi.

Radiyomiz yene 2014 - yili 21 - dékabirda taylandtiki tutup turush lagérigha qamalghan yüzlerche Uyghur musapirlar ichidin emdila 4 yashqa kirgen Uyghur bala abdulla abduwelining paji'esini anglatqan idi.

Melum bolushiche, uzaq mezgillik tutqunluq hayatida ménge tubérkulyoz késellikige giriptar bolghan 4 yashliq abdulla taylandtiki bir doxturxanida ata - anisiz we ige - chaqisiz halda bu rehimsiz dunya bilen xoshlashqan idi.

Toluq bet