Сүрийәдики бомбардимандин қутқузувелинған 5 яшлиқ өсмүр омран сүрийәдики инсанлиқ кризисиниң йеңи йүзини ечип бәрди

Мухбиримиз ирадә
2016-08-18
Share

Чаршәнбә күни сүрийәниң аләппо шәһиридики бомбардиманда яриланған 5 яшлиқ өсмүр омранниң топа-чаң вә қанға миланған һалда қутқузуш аптомобилида тартилған сүрити күчлүк муназирә қозғап, сүрийәдә давам қиливатқан инсанлиқ кризисиниң йәнә бир символиға айланди.

С н н теливизисийиниң хәвиридин қариғанда, сүрийәдики өктичи күчләр билән сүрийә армийиси сүрийәдики муһим шәһәрләрниң бири болған аләппо шәһириниң контроллуқини қолиға елиш үчүн елишиватқан болуп, чаршәнбә күни ахшам саәтлиридә елип берилған бомбардиманниң сүрийә һөкүмити армийиси яки сүрийә армийисини қоллаватқан рус армийиси тәрипидин елип берилғанлиқи һазирчә ениқ әмәс икән. 5 яшлиқ омран бомбардимандин кейин қутқузуш ишлириға қатнашқанлар тәрипидин еғир зәхим көргән бир бинаниң балконида пешанисидин яриланған һалда байқалған. Мәлум болушичә, униң 1 яшлиқ, алтә яшлиқ вә 11 яшлиқ қериндашлири вә ата-анилириму бирликтә қутқузувелинған.

Бүгүн омранниң қорқуп кәткән һалда олтурған бу сүрити дунядики барлиқ мәтбуатларда елан қилинди вә шундақла иҗтимаий тор бәтләрдә кәң тарқилип күчлүк муназирә қозғиди. Нурғун тордашлар бу инсанлиқ үчүн бир номус, дәп баһалиди. Өткән йили деңиз йоли арқилиқ явропаға қачмақчи болған сүрийәлик панаһланғучиларниң кемиси өрүлүп кәткәндин кейин суда боғулуп қалған 3 яшлиқ сүрийәлик өсмүрниң сүрити дуняни зил-зилигә салған иди.

Сүрийәдики ички уруш башланғили 5 йил болған болсиму, русийә вә хитай хәвпсизлик кеңишидә сүрийәдә һәрбий күч арқилиқ арилишишқа қарши чиққандин буян, дуня дөләтлири бу мәсилини һәл қилишта паләч һалға чүшүп қалған иди. Бешир әсәдниң сүрийәдә қиливатқан бомбардиманлири нәтиҗисидә һазирғичә 400 миңдин ошуқ кишиниң җенидин айрилғанлиқи мәлум.

Бүгүн нюйорк вақти гезитиниң обзорчиси николас киристоф бу һәқтики мулаһизисидә, америкиниң сүрийә мәсилиисидики муваппәқийәтсизликини тәнқид қилип “обама һөкүмити сүрийә мәсилисини һәл қилишта интайин пассип позитсийидә болди. Бу обаманиң сиясий һаятиға дағ чүшүридиған әң чоң нуқсанлириниң бири бопқалиду” деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт