Süriye prézidénti besher esedning Uyghur mesiliside xitayni shertsiz qollaydighanliqini bildürüshi diqqet qozghidi

Süriye prézidénti besher esed süriyening Uyghur mesiliside xitayni shertsiz qollaydighanliqini bildürgen.

Xitayning “Yershari waqti géziti” ning xewiridin melum bolushiche, süriye prézidénti besher esed demeshqte xitay tashqiy ishlar ministiri wang yi bilen körüshken. Ikki terep körüshishide besher esad xitayning süriye hökümitini qollighanliqigha rehmet éytqan, shundaqla süriyening eng qiyin mezgilni bashtin kechürgenlikini tilgha alghan. U: “Süriye teywen, shinjang we xongkonggha munasiwetlik mesililerde xitayni shertsiz qollaydu,” dégen.

Wang yi xitay-süriye ikki döletning bir-birige ishinip we qollap kelgenlikini, shundaqla öz ara menpe'et yetküzüsh asasidiki hemkarliqini izchil dawamlashturidighanliqini bildürgen.

Besher esadning yuqiriqi sözliri islam elliri rehberlirining Uyghur musulmanlirigha qiliwatqan yüzsizlikining yene bir misali süpitide ijtima'iy taratqularda küchlük munazire qozghidi.

Amérika hökümiti we bir qisim gherb döletliri parlaméntlirining xitayni “Uyghurlargha irqiy qirghinchiliq qiliwatidu” dep eyiblishining eksiche, islam dunyasining sükütni tallishi, hetta ochuq-ashkara qollishi küchlük diqqet qozghawatqan mesililerning biri bolup kelmekte.

Xitay hökümiti iqtisadiy mu'amile arqiliq islam hakimiyetlirini ‍özlirining sizghan siziqi boyiche méngishqa qistashni dawam qilduruwatqan bolup, yéqinda pakistanning xitay hökümitining Uyghur diyaridiki zulumlirini aqlashni yenimu kücheytip, pakistan tewesidiki Uyghurlarni kontrol qilish hemde bir qisimlirini xitaygha ötküzüp bérishi, bu réyalliqni téximu ashkarilighan idi.