Хитай һөкүмәт таратқулири 5 яшлиқ омранниң дуняни ләрзигә салған син көрүнүшини «сахта қураштурулған хәвәр» дәп иғва тарқатқан

Мухбиримиз қутлан
2016-08-22
Елхәт
Пикир
Share
Принт

Хитай мәркизий телевизийәси сүрийәдики бомбардиманда қутқузувелинған 5 яшлиқ омранниң син хәвири «гуманлиқ» дәп иғва тарқитип, уни «ғәрбниң тәшвиқат уруши» дики бир сахта көрүнүш, дегән.

Мәлумки, 17-авғуст күни сүрийәниң һәләп шәһиридики шиддәтлик бомбардиманда яриланған 5 яшлиқ бала омранниң бичарә һалити дуняви таратқуларда көрситилип, милйонлиған инсанларниң йүрәк-бағрини әзгән иди. Шу күни америка дөләт ишлири министирлиқи бу һәқтә инкас қайтуруп, омранни сүрийә урушиниң «һәқиқий йүзи» дегән иди.

Һалбуки, хитай мәркизий телевизийәси пүтүн дуня таратқулирида қизиқ нуқта болған 5 яшлиқ омранниң һекайисини «гуманлиқ», униңдики син көрүнүшиниң «сахта вә ясалған болуши еһтемалға йеқин» дегән.

Хитайниң бу һәқтики хәвиридә йәнә «нәқ мәйдандики ишчилар алди билән балини қутқузуш үчүн җиддий һәрикәт қилмай, әксичә камераға елишқа алдириған» дейилгән.

Мәлумки, хитай өз иттипақдиши русийә билән бирликтә сүрийәдики бәшәр әсәд һөкүмитини қоллаватқан болуп, көзәткүчиләр, русийә билән хитайниң һәләптики исламий гуруппилар контрол қиливатқан районларни бомбардиман қилғанлиқини илгири сүрмәктә.

Хитай һөкүмәт таратқулириниң 5 яшлиқ омран һәққидики хәвәрләрни йоққа чиқириши уларниң ғәрб таратқулири билән сүрийә мәсилисидә күч синишиватқанлиқини ашкарилимақта.

Пикирләр (0)
Share
Толуқ бәт