Хитайниң сүрийәгә қошун әвәтидиғанлиқи хәвәр қилинмақта

Мухбиримиз ирадә
2017-11-30
Елхәт
Пикир
Share
Принт

Бүгүн «оттура шәрқ көзәткүчиси» гезити дубәйдә нәшр қилинидиған«йеңи халиҗ» гезитидики бир хәвәрни мәнбә көрситип туруп, хитайниң сүрийәгә қошун әвәтишкә тәйярлиниватқанлиқини билдүрди.

Хәвәрдә хитай қошунлириниң сүрийә президенти бәшәр әл әсәд қисимлирини қоллаш үчүн баридиғанлиқи, чүнки хитайниң «шәрқий түркистан ислам һәрикити» һәққидики әндишилириниң зорийиватқанлиқи баян қилинған.

Хәвәрдә ейтилишичә, алдинқи һәптә хитай ташқи ишлар министири ваң йи сүрийә президентиниң мәслиһәтчиси ботайна шабан билән көрүшкәндә сүрийәниң «шәрқий түркистан ислам һәрикити» күчлирини йоқитиштики тиришчанлиқиға апирин оқуған икән. юқиридики гезитләрни учур билән тәминлигән мәнбәләр хитайниң бу қетим сүрийәгә «сибирийә йилпизи» вә «кечә йилпизи» дәп атилидиған икки алаһидә қошун әвәтидиғанлиқини билдүргән.

Хәвәрдә көрситилишичә, сүрийә һөкүмити 2015-йили 5000 нәпәр хитай әскириниң сүрийәгә киришигә, уларниң сүрийәниң ғәрбий қисмидики латакияға орунлишишиға рухсәт қилған икән. Улар арисида хитайниң һәрбий мәсилиһәтчилириниңму барлиқи мәлум.

Хитай б д т хәвпсизлик кеңишидики 5 даимий әза дөләтиниң бири болуп, у русийә билән бирликтә бир қанчә қетим хәвпсизлик кеңишидики рәт қилиш һоқуқини қоллинип, бәшәр әсәд һөкүмитиниң мәнпәәтлирини қоғдап қалған иди.

Пикирләр (0)
Share
Толуқ бәт