Уйғур әдиб вә шаир таһир һамут изгил “васлав хавел хәлқара иҗадий өктичилик мукапати” ға еришкән

Вашингтондин мухбиримиз ирадә тәйярлиди
2024.05.23

Уйғур әдиб вә шаир таһир һамут изгил “кишилик һоқуқ фонди” тәрипидин тарқитилидиған “васлав хавел хәлқара иҗадий өктичилик мукапати” ға (Václav Hav el International Prize for Creative Dissent) еришкән. Мәркизи ню-йорк шәһиридики “кишилик һоқуқ фонди” тәрипидин тарқитилидиған бу мукапат 1989-йили шәрқий явропада коммунизм лагериға хатимә берилгән мәзгилдә чех җумһурийитиниң демократийәлишиши үчүн зор һәссә қошқан шундақла чех җумһурийитиниң коммунистик түзүми ғулиғандин кейинки тунҗи пирезиденти болған васлав хавелниң хатириси үчүн 2012-йилидин бери тарқитилип кәлгән.

Кишилик һоқуқ фонди қурғучиси тсор халворсен (Thor Halvorssen) бу һәқтики баянатида мундақ дегән: “һәр йили хавел мукапати җасарәт вә иҗадчанлиқ билән зомигәрликләрни ашкарилап кәлгәнләргә берип кәлди, уларниң хизмити пәвқуладдә җасарәт вә әқил-парасәтниң испати”.

Мәзкур орган таһир һамут изгил һәққидики баянатида, униң “көзгә көрүнгән уйғур шаири, филим ишлигүчи вә паалийәтчи икәнликини, 90-йилларда иҗадийити сәвәблик хитай түрмисидә үч йиллиқ қамақ җазасиға учриған таһир һамутниң, 2017-йили башланған зор көләмлик тутқундин қутулуп чиққан аз сандики уйғур зиялийлириниң бири икәнликини” баян қилған.

Улар йәнә, таһир һамут изгил әпәндиниң әслимә китаби “‛кечидә тутқун қилинишни күтүш‚ ниң уйғурларға қаритиливатқан ирқй қирғинчилиқни дуняға ашкарилашта рол ойниған аз сандики гуваһлиқларниң бири икәнликини муәййәнләштүргән.

Бу мукапат 4-июн күни, норвегийәниң осло шәһиридә өткүзүлидиған 2024-йиллиқ осло әркинлик мунбири (OFF) дә өткүзүлидиған мурасим арқилиқ саһиблириға тарқитип берилидикән.

Бу мукапатқа таһир һамут изгил әпәнди билән биргә, иранлиқ сәнәткар томаҗ салиһи вә венезуелалиқ пианино маһири, сәнәткар габриела монтеро қатарлиқлар лайиқ көрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.