Uyghur edib we sha'ir tahir hamut izgil “Waslaw xawél xelq'ara ijadiy öktichilik mukapati” gha érishken

Uyghur edib we sha'ir tahir hamut izgil “Kishilik hoquq fondi” teripidin tarqitilidighan “Waslaw xawél xelq'ara ijadiy öktichilik mukapati” gha (Václav Hav el International Prize for Creative Dissent) érishken. Merkizi nyu-york shehiridiki “Kishilik hoquq fondi” teripidin tarqitilidighan bu mukapat 1989-yili sherqiy yawropada kommunizm lagérigha xatime bérilgen mezgilde chéx jumhuriyitining démokratiyelishishi üchün zor hesse qoshqan shundaqla chéx jumhuriyitining kommunistik tüzümi ghulighandin kéyinki tunji pirézidénti bolghan waslaw xawélning xatirisi üchün 2012-yilidin béri tarqitilip kelgen.

Kishilik hoquq fondi qurghuchisi tsor xalworsén (Thor Halvorssen) bu heqtiki bayanatida mundaq dégen: “Her yili xawél mukapati jasaret we ijadchanliq bilen zomigerliklerni ashkarilap kelgenlerge bérip keldi, ularning xizmiti pewqul'adde jasaret we eqil-parasetning ispati”.

Mezkur organ tahir hamut izgil heqqidiki bayanatida, uning “Közge körün'gen Uyghur sha'iri, filim ishligüchi we pa'aliyetchi ikenlikini, 90-yillarda ijadiyiti seweblik xitay türmiside üch yilliq qamaq jazasigha uchrighan tahir hamutning, 2017-yili bashlan'ghan zor kölemlik tutqundin qutulup chiqqan az sandiki Uyghur ziyaliylirining biri ikenlikini” bayan qilghan.

Ular yene, tahir hamut izgil ependining eslime kitabi “‛kéchide tutqun qilinishni kütüsh‚ ning Uyghurlargha qaritiliwatqan irqy qirghinchiliqni dunyagha ashkarilashta rol oynighan az sandiki guwahliqlarning biri ikenlikini mu'eyyenleshtürgen.

Bu mukapat 4-iyun küni, norwégiyening oslo shehiride ötküzülidighan 2024-yilliq oslo erkinlik munbiri (OFF) de ötküzülidighan murasim arqiliq sahiblirigha tarqitip bérilidiken.

Bu mukapatqa tahir hamut izgil ependi bilen birge, iranliq sen'etkar tomaj salihi we wénézu'élaliq pi'anino mahiri, sen'etkar gabri'éla montéro qatarliqlar layiq körülgen.