Xitay teywen mesilisini bahane qilip, tinch okyandiki herbiy tehditini kücheytken

Amérika dölet mejlisi ezalirining 4-ayda teywenni ziyaret qilishi, arqidin awam palata re'isi nensiy pélosining 8-ayda teywenni ziyaret qilish pilanining otturigha chiqishi bilen teng xitay herbiy küchliri teywen arilini öz ichige alghan hindi-tinch okyan rayonida amérika we uning ittipaqdashlirigha tehdit sélishni kücheytken.

7-Ayning 26-küni “Washn'gton pochtisi” torida élan qilin'ghan bir xewerde körsitilishiche, amérika dölet mudapi'e ministirliqi hindi-tinch okyan xewpsizliki ishlirigha mes'ul mu'awin ministir iliy ratnér (Ely Ratner) xitay armiyesining ötken 5 yilda amérika we uning ittipaqdashlirining ayropilanlirigha yéqin ariliqtin tehdit sélish we déngiz charlishigha dexli-teruz qilishtek qilmishlirining köpiyip ketkenlikini bildürüp: “Qarighanda bu hergizmu birer uchquchining öz aldigha chiqarghan qarari emes, belki xitayning bir siyasiti we usuli” dégen. Amérika dölet mudapi'e ministiri loyid ostin (Lloyd Austin) aldinqi ayda shangrila di'alogida qilghan sözidimu xitayning hindi-tinch okyan rayonigha xoja bolushqa urunushlirining barghanche öktem we tajawuzchi xaraktérini alghanliqini bildürgen.

Iliy ratnér xitayning hazir herbiy tehdit we qoral küchi bilen hindi-tinch okyan rayonining nöwettiki weziyitini buzushqa urunuwatqanliqini, buning emeliyette xitayning uzundin béri bu rayonda iqtisad we diplomatiye arqiliq öz tesirini kéngeytish pilanighimu xilap ikenlikini éytqan.

Rusiye ukra'inagha hujum qilghandin kéyin, xitayning teywen'ge séliwatqan tehditimu kücheygen. Amérika prézidénti jow baydén “Eger xitay teywenni bésiwélishqa urunsa amérika uninggha qoralliq arilishidu” dégen, emma amérika hökümitining teywenni qoghdash qanunida yenila éniqsizliq, amérika rehberliride bolsa qararsizliq mewjut iken. Amérika awam palata re'isi nensiy pélosining 8-ayda teywen'ge bérish-barmasliqimu nöwette xitayning tehditige uchrawatqan mesile bolup, amérika herbiy terep bilen hökümet bu ishta téxi bir pikirge kélelmigen.