Amérika tashqiy ishlar ministiri blinkén teywen mesiliside xitayni eyibligen

Muxbirimiz irade
2022.10.27

Amérika tashqiy ishlar ministiri antoniy blinkén “Xitay teywenning nechche on yildin béri dawam qiliwatqan halitini buzushqa urunuwatidu” dégen.

U 26-öktebir küni amérika “Blumbérg” gézitining mexsus ziyaritini qobul qilghanda, “Xitay teywenning hazirqi halitini özgertishke urunuwatidu, teywenni qoshuwélishni tézletmekchi boluwatidu” dégen.

Blinkén yene mundaq dégen: “Menche, ular buni qandaq ishqa ashurush toghrisidimu qarar chiqirip boldi, bu teywen'ge téximu köp bésim ishlitish, mejburlash, her xil yollar bilen ularning turmushini qiyinlashturush dégenlerni öz ichige élishi mumkin”

“Blumbérg” ning éytishiche, amérika tashqiy ishlar ministiri blinkén aldinqi hepte qilghan bir sözidimu xitayning teywenni “Perez qilin'ghandinmu téz” waqitta ishghal qilishqa urunuwatqanliqini éytqan. Blinkénning xitayning teywen'ge tajawuz qilish éhtimalliqi toghrisidiki bu sözi, xelq'arada küchlük ghulghula qozghighan.

Blinkén “Blumbérg” qa qilghan sözide yene mundaq dégen: “Biz toqunushni xalimaymiz, soghuq munasiwetler urushi qilishnimu xalimaymiz. Bizning meqsitimiz xitayni qamal qilish, chekleshmu emes. Biraq shuni eskertish zörürki, bizning öz menpe'etimizni we qimmet qarashlirimizni qoghdash iradimiz qet'iy. Bolupmu teywen mesiliside biz teywenning nechche on yil dawamlashqan halitini saqlap qélishni, bu heqtiki mesililerni tinch usulda hel qilishni teshebbus qilimiz.”

Blinkénning “Blumbérg” gézitige qilghan bu eng yéngi sözi, xitay kompartiyesining 20-qurultiyi emdila axirliship, shi jinping 3-qétim xitayning eng aliy rehbirige aylan'ghan bir mezgilge toghra kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.