Таҗикистан 903 адәм үстидин хәлқаралиқ туруш буйруқи чиқарған

Мухбиримиз үмидвар
2016-01-26
Share

Таҗикистан бихәтәрлик даирилири 200 дин артуқ адәмни тутқун қилған болуп, уларни таҗикистанда сиясий өзгириш қозғаш пиланиға қатнашқан дәп гуман қилинған. Пәрғанә учур ториниң хәвәрлиридә көрситилишичә, таҗикистан ички ишлар министири рамизан рәхимзадәниң 25-январ күни ашкарилишичә, бу адәмләр өткән йили 9-айдики сияси өзгириш қилишқа урунуш билән мунасивәтлик болуп, уларниң 11 нәпири өзлирини мәлум қилғанлар икән.

Таҗикистанниң “асия пилус” агентлиқиниң йезишичә, мәзкур тутқун қилинғанлар үстидин җинайи дело турғузулуп, уларниң материяллири таҗикистан алий сотиға йоллап берилгән.

Хәвәрләрдин мәлум болушичә өткән йили 9-айниң башлирида таҗикистан муавин дөләт мудапиә министири абдухәлим назарзадә сиясий өзгириш қозғашқа урунған болсиму нәтиҗә қазиналмиған иди. Униң қораллиқ гурупписи йошурунувалған иди. Һөкүмәт күчлири һәрбий һәрикәт җәрянида 38 нәпәр назарзадә әгәшкүчисини йоқатқанлиқини хәвәр қилған иди.

Таҗикистан ички ишлар министири рәһимзадә таҗикистан һөкүмитиниң 903 нәпәр таҗикистанлиқ үстидин хәлқаралиқ тутуш буйруқи чиқарғанлиқи вә уларни әсәбийлик, террорлуқ тәшкилати уюштуруш қатарлиқ ишларда әйиблигәнликини билдүргән.

Униң ейтишичә, 2015-йили таҗикистан җумһурийитидә 835 террорлуққа алақидар җинайәт қилмиши паш қилинған болуп, 247 адәмгә рәсмий җинайәт турғузулған.

Оттура асия учур васитилириниң хәвәрлиридә көрситилишичә, өткән йили 9-айда таҗикистан һөкүмити таҗикистанда йүз бәргән сиясий өзгириш қилишқа урунуш һәрикитини, таҗикистан ислам гүллиниш партийәсигә бағлиған болуп, һөкүмәт бу тәшкилатни террорлуқ тәшкилати дәп атиған иди.

Мәзкур вәқә вә бу вәқәниң җавабкарлиқи зиммисигә артилған абдухәлим назарзадә таҗикистан җумһурийитиниң муавин дөләт мудапиә министирлиқ вәзиписини атқурған болуп, мәзкур вәқә һәм мәзкур шәхс һәққидә бир мәһәл көп учурлар оттуриға чиққан иди.

Таҗикистанда совет иттипақи йимирилгәндин кейин бир қетим кәң көләмдә ички уруш, йәни ислами гуруппа билән һакимийәт арисида уруш партлап көп адәм өлгән вә көп адәм русийә һәм башқа қошна әлләргә мусапир болған иди. Президент емам ели рахман узун йиллардин буян таҗикистанни идарә қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт