Xitay bilen tajikistan “Térorluqqa qarshi birleshme maniwér” bashlighan

Muxbirimiz irade
2021-08-19
Share

Xitay bilen tajikistan birlikte “Térorluqqa qarshi birleshme manéwir” bashlighan. Igilinishiche, xitay jama'et xewpsizlik ministirliqi bilen tajikistan ichkiy ishlar ministirliqi birlikte uyushturghan bu maniwér ikki kün dawam qilidiken.

“Jenubiy xitay etigenlik géziti” ning xewer qilishiche, talibanlar afghanistanni igilep 3 kündin kéyin ötküzülgen bu maniwér, xitayning rayondiki bixeterlik endishisining kücheygenlikini namayen qilidiken. Xitay hökümiti afghanistan we ottura asiyadiki “Diniy esebiy guruppilar” we “Térorchilar” ning chégradin ötüp Uyghur rayonigha kirishidin, shundaqla xitayning “Bir belwagh bir yol” qurulushigha xewp tughdurushidin ensireydiken.

Xitay jama'et xewpsizlik ministirining ministéri jaw kéji bu heqtiki yazma bayanatida: “Birleshme manéwir xitay-tajikistan ikki terepning térorluqqa qarshi turush küchlirining maharet sewiyisini östüridu hemde ikki terepning térorluqqa qarshi turush iradisini namayan qilidu,” dégen. Ikki terep yene teshkillik jinayetlerge qarshi turush, uchur almashturush we yuqiri sapaliq xadimlarni yétishtürüsh qatarliq mesililerni muzakire qilghan.

Xewerde éytilishiche, kéler ayda tajikistan “Shangxey hemkarliq teshkilati” ning bashliqlar yighinigha sahibxanliq qilidighan bolup, nöwettiki afghanistan weziyitining bu yighinning eng muhim küntertipliridin biri bolidighanliqi mölcherlenmektiken.

Chet ellerdiki Uyghur közetküchilerning qarishiche, amérika afghanistandin esker chékindürüp chiqqandin kéyin, xitay hökümiti bir tereptin taliban küchliri bilen yéqin munasiwet qurushqa kirishken bolsimu, emma yene bir tereptin Uyghur rayonining muqimliqi mesiliside yenila talibandin dawamliq endishe qilidiken.

Halbuki, afghanistan da'iriliri téxi aldinqi ayda afghanistanda 10 neper xitay jasusini qolgha chüshürgen idi. Ular bu xitay jasusliri ichide ikki nepirining taliban'gha tewe térrorluq teshkilati “Heqqaniyet tori” bilen munasiwiti barliqini, bu 10 neper xitay jasuslirining afghanistanda “Sherqiy türkistan islam herikiti” din ibaret bu saxta teshkilatni peyda qilmaqchi bolghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet