Таҗикистан көп санда хитай ишчилирини қобул қилиду

Мухбиримиз үмидвар
2018-01-28
Share

Хитай билән таҗикистан арисидики мәбләғ селиш келишимлиригә асасән таҗикистан һөкүмити хитайдин йәнә 2 миң 400 ишчи қобул қилидиғанлиқини елан қилған болуп, өткән йили 6-айда таҗикистан тәрәп асаслиқи хитайдин болуп, икки миңға йеқин чәтәл ишчисини қобул қилидиғанлиқини билдүргән иди.

Азадлиқ радиосиниң хәвәр қилишичә, хитайдин келидиған бу ишчилар түркмәнистан-хитай тәбиий газ туруба линийисиниң таҗикистандин өтидиған 400 километирлиқ қисмини қуруш үчүн ишләйдикән.

Хәвәрдә илгири сүрүлүшичә, һазир хитай таҗикистандики асаслиқ мәбләғ салғучи дөләт болуп, түркмәнистан-хитай тәбиий газ туруба линийисиниң таҗикистан қисми үчүн хитай таҗикистанға 3 милярд доллар мәбләғ селишқа вәдә бәргән иди. Таҗикистан тәрәп мәзкур туруба қурулушиниң өзлиригә зор иқтисадий пайда елип келидиғанлиқи вә көп сандики таҗикистанлиқларға иш пурсити яритидиғанлиқидин мәмнун болушқан. Әмма, хитайниң таҗикистанға зор мәбләғ селиши вә өз ишчилирини өзлири қурған завут-канлар вә қурулушларда ишлитиши таҗикистанлиқларда наразилиқларни кәлтүрүп чиқармақта. Азадлиқ радиосиға өз пикрини билдүргән таҗикистанлиқ иқтисадшунас содиқҗан носирофниң ейтишичә, хитай таҗикистанниң алтун, күмүш вә башқа йәр асти қиммәтлик металлирини қезиш билән шуғулланмақта. Бу дөләттики хитай ширкәтлири хитай таҗикистанға салған мәбләғләргә хитай техника үскүнилири вә материяллирини сетивалмақта. Хитай мәблиғидики туруба йоли қурулуши, завут-кан вә башқиларда асаслиқ ишларни хитай техниклири вә ишчилири орундимақта. Хитай таҗикистанға салған мәбләғләрниң көп қисмини йәнила хитайға қайтип кетиватқан болуп, булар таҗикистанниң қәрзи болуп, таҗикистан уни юқири пирсәнт билән төлиши керәк икән.
Пәрғанә учур агентлиқиниң хәвиридә ейтилишичә, таҗикистанда көп санда хитай ширкәтлири ишләватқан болуп, һәтта уйғур дияри билән чегридаш бәдәхшан аптоном областида, йәни памир районида хитай ширкити қиммәтлик металларни қазмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт