Талибан хитайниң афғанистанға дост дөләт икәнлики, уйғур қораллиқлирини қобул қилмайдиғанлиқини билдүргән

Американиң афғанистандин чекинишкә башлиши билән афғанистанниң нурғун җайлирини игиләшкә башлиған талибанлар “хитайниң афғанистанға дост дөләт икәнлики, уйғур қораллиқлирини қобул қилмайдиғанлиқи” ни билдүргән. “җәнубий хитай сәһәр почтиси” гезитиниң хәвәр қилишичә, талибанлар “уйғур қораллиқлириниң афғанистанға киришигә йол қоймайдиғанлиқи” ни билдүрүш билән бир вақитта йәнә “хитай билән афғанистанниң қайта қурулушиға мәбләғ селишни музакирә қилиш арзуси” ниму билдүргән.

Хәвәрдә баян қилинишичә, талибанларниң баянатчиси сухайил шаһен: “биз хитайға көп қетим бардуқ, улар билән яхши мунасивитимиз бар. Хитай достанә дөләт, биз афғанистанни қайта қуруш вә тәрәққий қилдурушни қарши алимиз. Әгәр хитайниң салған мәблиғи болса, биз униң бихәтәрликигә капаләтлик қилимиз” дегән. Хәвәрдә тәкитлинишичә, талибан баянатчиси “әл-қаидини өз ичигә алған һәрқандақ террорлуқ гуруһини афғанистанда чәкләйдиғанлиқи” ни ейтқан.

Хәвәрдә хитайниң талибанларниң афғанистанни игилиши билән афғанистан “шәрқий түркистан ислам һәрикитиниң базисиға айлинип қелишидин әндишә қилидиғанлиқи” тәкитләнгән болсиму, бирақ мутәхәссисләр “шәрқий түркистан ислам ислам һәрикити” тәшкилатниң афғанистанда мәвҗут икәнликигә җиддий гуман билән қарайдиғанлиқини билдүрүп кәлди. Америка һөкүмити өткән йили бу тәшкилатниң мәвҗутлуқиға аит йетәрлик пакит йоқлуқини билдүрүп, уни американиң террорлуқ тәшкилатлар тизимликидин чиқиривәткән.