Taliban xitayning afghanistan'gha dost dölet ikenliki, Uyghur qoralliqlirini qobul qilmaydighanliqini bildürgen
2021.07.12
Amérikaning afghanistandin chékinishke bashlishi bilen afghanistanning nurghun jaylirini igileshke bashlighan talibanlar “Xitayning afghanistan'gha dost dölet ikenliki, Uyghur qoralliqlirini qobul qilmaydighanliqi” ni bildürgen. “Jenubiy xitay seher pochtisi” gézitining xewer qilishiche, talibanlar “Uyghur qoralliqlirining afghanistan'gha kirishige yol qoymaydighanliqi” ni bildürüsh bilen bir waqitta yene “Xitay bilen afghanistanning qayta qurulushigha meblegh sélishni muzakire qilish arzusi” nimu bildürgen.
Xewerde bayan qilinishiche, talibanlarning bayanatchisi suxayil shahén: “Biz xitaygha köp qétim barduq, ular bilen yaxshi munasiwitimiz bar. Xitay dostane dölet, biz afghanistanni qayta qurush we tereqqiy qildurushni qarshi alimiz. Eger xitayning salghan meblighi bolsa, biz uning bixeterlikige kapaletlik qilimiz” dégen. Xewerde tekitlinishiche, taliban bayanatchisi “El-qa'idini öz ichige alghan herqandaq térrorluq guruhini afghanistanda chekleydighanliqi” ni éytqan.
Xewerde xitayning talibanlarning afghanistanni igilishi bilen afghanistan “Sherqiy türkistan islam herikitining bazisigha aylinip qélishidin endishe qilidighanliqi” tekitlen'gen bolsimu, biraq mutexessisler “Sherqiy türkistan islam islam herikiti” teshkilatning afghanistanda mewjut ikenlikige jiddiy guman bilen qaraydighanliqini bildürüp keldi. Amérika hökümiti ötken yili bu teshkilatning mewjutluqigha a'it yéterlik pakit yoqluqini bildürüp, uni amérikaning térrorluq teshkilatlar tizimlikidin chiqiriwetken.