Xitay talibanlargha 31 milyon dollarliq jiddiy yardem buyumi ewetidighanliqini élan qilghan

Muxbirimiz erkin
2021-09-09
Share

Xitay afghanistandiki talibanlargha 31 milyon dollarliq jiddiy yardem buyumi ewetidighanliqini élan qilish bilen bir waqitta, talibanlarning "Radikal küchler" bilen bolghan alaqisini üzüshini telep qilghan. "El-jezire" qanilining xewer qilishiche, béyjingning 31 milyon dollarliq yardem buyumi bughday, dora, qishliq lawazimetlikler we bir qisim korona wirusi waksinilirinimu öz ‍ichige alidiken.

Xitay ilgiri talibanlar bilen dostluq ornitishi we afghanistan'gha meblegh sélishi talibanlarning "Sherqiy türkistan islam herkiti" ni qollash-qollimasliqi, uninggha zerbe bérish-bermeslikige baghliq ikenlikini bildürgen idi.

Melum bolushiche, xitay tashqiy ishlar ministiri wang yi xitayning talibanlargha yardem bérish wedisini 8-séntebir ötküzülgen iran, pakistan, tajikistan, özbékistan, türkmenistan qatarliq afghanistan'gha qoshna döletler tashqiy ishlar ministirlirining ékran yighinida élan qilghan. U: "Bezi xelq'ara küchlerning siyasiy, iqtisadiy we maliye wastilirini qollinip, afghanistanda yéngi awarichiliq yaratmaqchi" ikenlikini éytqan. Biraq bu "Xelq'ara küchler" ning kim ikenlikini tilgha almighan.

Yighinda wang yi talibanlarni barliq "Radikal küchler" bilen bolghan alaqisini üzüshke, ularni basturushqa chaqirip: "Barliq terepler istixbarat almashturush we chégrani kontrol qilishni kücheytishi, afghanistandin kirmekchi bolghan térorliq guruhlirini tutushi we yoqitishi kérek," dégen. Wang yi bu sözlerni talibanlar yéngi hökümet qurghanliqini élan qilghan bir waqitta éytqan. Xitay yéngi qurulghan taliban hökümitini qarshi alidighanliqini élan qilghan idi.

Talibanlar ilgiri xitayning ichkiy ishlirigha arilashmaydighanliqi, héchqandaq bir teshkilatning afghanistanda xitaygha qarshi heriket qilishigha yol qoymaydighanliqini bildürüp, xitayni afghanistanning qayta qurulushidiki "Asasliq shériki" dep élan qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet