Йеңи таможна беҗиниң йолға қоюлуши тему вә шеингә қаттиқ зәрбә бериду дәп қаралмақта

Америка таратқулири, трамп һөкүмитиниң хитайға қарши йолға қойған йеңи таможна беҗиниң амазонни қайтидин әслигә кәлтүрүп, хитай ширкәтлири болған тему вә шеинниң америкада тез сүрәттә өсүшигә қаттиқ зәрбә беридиғанлиқини илгири сүргән.

CNBC Ниң хәвиригә асасланғанда, трамп һөкүмитиниң хитайға қарши йеңидин йолға қойған таможна беҗиниң амазонға йеңи пурсәтләрни елип келип, тему вә шейинға охшаш хитайниң тор арқилиқ парчә сетиш ширкәтләрниң америкадики сода “йочуқи” ни “суйиистемал қилиш” арқилиқ тиз сүрәттә тәрәққий қилишиниң алдини алидикән.

 Пирезидент доналд трампниң йеңи таможна беҗи, йәни америкаға келидиған барлиқ хитай маллиридин 10 пирсәнт таможна беҗини қошуп елиш 2-феврал сәйшәнбә күнидин башлап йолға қоюлған. Буниңға асасланғанда, америка-хитай таможна беҗиға мәнсуп мәһсулатларниң таможна беҗи кәчүрүм қилинип сетилишини чәкләйдикән. Шуниңдәк 800 долларғичә болған посулка (халта) ларниң бурунқидәк тәкшүрүлмәстин вә баҗ қоюлмастин америкаға киришигә йол қуюлмайдикән.

Алақидар мәсулларниң ейтишичә, йеқиндин буянқи 800 доллардин төвән болған малларниң чәттин киргүзүлүп америкада сетилиш миқдарида йүз бәргән партлаш характерлик әһвал асаслиқи хитай билән мунасивәтлик торда парчә сетиш суписи болған “шеин”, “тему” билән бағлинишлиқ икән. Шуңа пирезидент доналд трампниң йеңи таможна беҗини йолға қоюп 800 долларғичә болған посулка (халта) ларниң бурунқидәк тәкшүрүлмәстин вә баҗ қоюлмастин америкаға киришигә йол қоюлмаслиқи “шеин” вә “тему” ға қаттиқ зәбә берип, амазонға зор риқабәт күчи ата қилидикән.

 Мутәхәссисләр, һәр күни 4 милйон посулкиниң таможнидин тәкшүрүлмәй өтүшини “йочуқ” дәп атиған. Шеин вә темуға охшаш хитайниң әрзан баһалиқ парчә сатқучилириниң бу “йочуқ” тин пайдилинип, уйғур мәҗбурий әмгики билән ишләнгән кийим-кечәкләрни биваситә америкалиқларға сетишини әйибләп кәлмәктә.