Kishilik hoquq teshkilatliri: “Tamozhna uchurlirining ochuq-ashkara bolushi Uyghur mejburiy emgikini hel qilishta muhim rol oynaydu”

Dunyadiki 50 nechche teshkilat yawropa ittipaqining soda-iqtisad we tamozhna da'irilirige ochuq xet élan qilip, yawropa ittipaqi tamozhna uchurlirining ammiwi teshkilatlargha ochuq-ashkara bolushi, bu arqiliq xitayning Uyghur mejburiy emgek mehsulatlirini éksport qilishidin téximu ünümlük rewishte saqlinishni telep qilghan.

Yawropa komissiyesining iqtisadiy ishlar komissari pa'olo géntilonigha we yawropa komissiyesining bazar, soda, muhit-déngizchiliq hem tamozhna komissarlirigha, shundaqla yawropa parlaméntining alaqidar komitétlirining mes'ullirigha yézilghan mezkur ochuq xette, yawropa ittipaqining tamozhna qanuni islahat pilanining qarshi élinidighanliqi, biraq bu pilanning ünümlük ijra qilinishi üchün eza döletlerning teminlesh zenjiri hem soda uchurlirining tepsilatlirida ochuq-ashkara bolushi kérekliki tekitlen'gen.

Ochuq xette körsitilishiche, soda, tamozhna uchurlirining ammigha ochuq-ashkara bolushi “Eza döletlerning shirket we da'iriler bilen hemkarliship, shirketlerning teminlesh zenjiridiki kishilik hoquq we muhit mesililirige da'ir xewplerni bir terep qilishigha türtke bolidiken”.

Ochuq xette mundaq déyilgen: “Tamozhna uchurlirigha asan érishish xitayning shinjang Uyghur aptonom rayonidiki Uyghur mejburiy emgikining tragédiyelik weziyitini hel qilishta oynaydighan roli we tamozhna uchurlirining kishilik hoquq depsendichiliklirini hel qilishqa qandaq türtke bolidighanliqini körsitip bermekte”.

Ochuq xette körsitilishiche, tetqiqatchilar we ammiwi teshkilatlar bu sanliq melumatlargha qismen érishish arqiliq, Uyghur rayonidin kelgen soda éqimigha a'it muhim delillerni teminlep, kiyim-kéchek, énérgiye we yémek-ichmek saheside aktip bolghan shirketlerni mejburiy emgekke shérik bolush yoshurun xewpi toghrisida uchurlanduridiken. Bu ochuq xetke “Xelq'ara qulluqqa qarshi turush teshkilati”, “Awstraliye tengritagh ayallar jem'iyiti”, “Gérmaniye exlaqiy shérikchilik jem'iyiti”, “Pakiz kiyim-kéchek herikiti”, “Yawropa soda uyushmisi ittipaqi” qatarliq 56 teshkilat imza qoyghan.