Уйғур диярида таңзоңза йейишни рәт қилған уйғурларниң тутқун қилинғанлиқи илгири сүрүлди

Мухбиримиз әркин
2018-06-22
Елхәт
Пикир
Share
Принт

Мусулманларниң бу йилқи роза һейти хитайниң «таңзоңза байрими» билән охшаш бир мәзгилгә тоғра кәлгән иди.

Уйғур кишилик һоқуқ тәшкилатлириниң илгири сүрүшичә, хитай һөкүмити бир тәрәптин уйғур диярида мусулманларниң роза һейтни тәбриклишигә һәр хил чәклимиләрни қоюп, йәнә бир тәрәптин уларни хитайлар билән таңзоңза байрими өткүзүшкә вә таңзоңза йейишкә мәҗбурлиған.

Дуня уйғур қурултийи пәйшәнбә күни чәтәлдики бәзи хитай аммиви тәшкилатлириға бәргән учурида хитай даирилириниң хотән, қәшқәр, ақсу қатарлиқ җайларда таңзоңза байримини тәбрикләшни вә таңзоңза йейишни рәт қилған аз дегәндә 40 дәк уйғурни тутқун қилип, «йиғивелиш лагери» ға солиғанлиқини билдүрди.

Таңзоңза байрими шәрқий асия мәдәнийәт чәмбирикидики милләтләрниң әнәниви байрими болуп, мәзкур байрамниң хитайда «урушқақ бәгликләр» дәвридә өткән шаир чү йүәнни хатириләштин келип чиққанлиқи илгири сүрүлиду.

Уйғур кишилик һоқуқ тәшкилатлириниң илгири сүрүшичә, мусулман уйғурларни чошқа йеғи арилаштурулидиған таңзоңза йейишкә мәҗбурлаш уларниң диний етиқади вә йемәк-ичмәк адәтлиригә қилинған еғир дәпсәндичилик икән.

Дуня уйғур қурултийиниң баянатчиси дилшат ришит пәйшәнбә күни радийомизға бәргән учурида йәнә ақсуниң ават, қәшқәрниң конашәһәр, хотәнниң қарақаш наһийәлиридә таңзоңза йейишни рәт қилған 100 дин артуқ аилигә 50 сомдин 1000 сомғичә җәриманә қоюлғанлиқини билдүрди. Униң көрситишичә, хитайниң мәқсити уйғурларниң исламий етиқадини аҗизлаштуруп, уларни тезрәк ассимилятсийә қилиш икән.

Хитай һөкүмити бу йил чағанда уйғурларни һойлисиға панус есип чағанни күтүвелиш, хитайларни тәклип қилип бирликтә түгүрүк түгүп йейиштәк паалийәтләргә уюштурған иди.

Пикирләр (0)
Share
Толуқ бәт