Хитайдики мәдәнийәт инқилаби музейи түрлүк баһаниләр билән тақап қоюлған

“нюйорк вақти” гезитиниң хәвәр қилишичә, хитайдики мәдәнийәт инқилабиға аит бирдин - бир музей хитайдики пикир әркинлики чәклимисиниң тәсиригә учриған. Хәвәрдин қариғанда, хитайниң шәнтов шәһиридә 2005- йили сабиқ йәрлик компартийә әмәлдари болған пең чйәнниң йетәкчилики вә нурғун хусусий орган вә шәхсләрниң ярдими билән мәдәнийәт инқилаби вә униң зийиниға учриғанларни әсләш үчүн бир музей қурулған икән.

Он йилдин буян тосалғусиз һалда очуқ турған бу музейда йеқиндин буян даириләрниң музей җайлашқан бағчини рәтләш, түзәш дәйдиған баһаниси билән тақилип қалған. Музейниң әтрапи пүтүнләй тосуветилгән. Музей сиртиға җайлаштурулған пилакатлар вә мәдәнийәт инқилабида зиянкәшликкә учриғучиларниң исимлири оюлған таш хатириләр, һәйкәлләрниң һәммиси һәр хил рәңлик компартийә тәшвиқати йезилған пиластиклар билән ориветилгән.

Музейниң қурғучиси пең чйән “нюйорк вақти ” гезити мухбириға қилған сөзидә өзиниң бу иштин һәйран қалғанлиқини ейтқан вә “биз дөлитимизниң тәрәққияти вә кәң ечиветилишиға әгишип, музейимиз техиму тәрәққий қилиду, дәп ойлиған. Әпсуски биз баһарни күтүп олтурсақ, қиш келип қалди” дегән. У шундақла йәнә бу музийни тақаш буйруқиниң юқиридин кәлгәнликигә ишинидиғанлиқини ейтқан.

“нюйорк вақти” гезити мухбири шәнтовниң йәрлик һөкүмитигә телефон қилған болсиму, җавабқа еришәлмигән. Телефонға чиққан һөкүмәт хадими соални аңлапла телефонни қоювәткән. Хәвәрдә ейтишичә, музейниң тақилиши ши җинпиң һакимийәт бешиға кәлгәндин кейинки қаттиқ сиясий реҗимға мунасивәтлик икән.