En'giliye we yaponiye xitay tehditige taqabil turush üchün tarixiy kélishim imzalighan

11-Yanwar küni en'giliye bash weziri rishi sunak (Rishi Sunak) bilen yaponiye bash weziri fumi'o kishida (Fumio Kishida) birlikte hindi-ténch okyanning muqimliqi we bixeterlikige kapaletlik qilip, xitay tehditige ortaq qarshi turushni meqset qilghan bir herbiy kélishimge qol qoyghan.

“Mudapiye xewerliri” (Breaking Defense) torining xewer qilishiche, mezkur tarixiy kélishim yaponiye bash weziri fomi'o kishdaning en'giliyege qaratqan resmiy ziyariti jeryanida imzalan'ghan.

En'giliye hökümitining bu heqtiki éniqlimisidin qarighanda, ikki dölet imzalighan bu herbiy kélishim (RAA) london bilen tokyoning hindi-ténch okyanni merkez qilghan halda “Téximu keng kölemlik, téximu murekkep herbiy manéwir we orunlashturushni pilanlash we yetküzüshini kücheytidighanliqi” din dérek béridiken. Bu kélishimge asasen, en'giliye qoralliq qisimliri yaponiyige orunlashsa bolidiken.

En'giliye bash weziri rishi sunak shu künidiki sözide “Ikki döletning munasiwiti soda we bixeterlikla emes, belki bizning ortaq qimmet qarishimizmu ilgiriki her qandaq waqittikidin küchlük” dégen.

U yene mundaq dégen: “Künséri keskinlishiwatqan bu dunyada we ilgiri körülüp baqmighan dunyawi xirislargha taqabil turush üchün, démokratik jem'iyetlerning mürini-mürige tirep méngishi, ilgiriki her qandaq waqittikidinmu bek muhim”.

Birleshme agéntliqining éytishiche, yéqinqi yillardin buyan xitayning hindi-ténch okyandiki herbiy mewjutluqini kücheytishi we hemde toxtimay teywenni ishghal qilish heqqide parakendichilik sélishi, rayondiki jiddiylikni kücheytken. Netijide yaponiye we en'giliye her ikki dölet herbiy hazirliqlirini kücheytipla qalmay, öz-ara mudapiye we bixeterlik hemkarliqinimu kücheytishke bel baghlighan.