Qirimdiki 82 yashliq tatar siyasiy pa'aliyetchi tutqundiki mezgilide hayatidin ayrilghan

Muxbirimiz qutlan
2017-11-25
Élxet
Pikir
Share
Print

Qirim yérim arili rusiye teripidin qaytidin ishghal qilin'ghandin buyan, qirimdiki tatarlar duch kéliwatqan siyasiy bésimlar xuddi Uyghur mesilisige oxshashla xelq'ara jem'iyetning diqqitini qozghimaqta.

Rusiye da'iriliri özining qirim yérim arilidiki ishghaliyet hökümranliqini qanunlashturush, yerlik qirimliqlarning awazini öchürüsh üchün tatar pa'aliyetchilirini üzlüksiz türde tutqun qilish, türmige tashlash we naraziliqlarni basturushtek usullarni qollinip kelmekte.

"Azadliq radiyosi" ning xewer qilishiche, qirim tatarlirining péshqedem siyasiy aktipliridin bu yil 82 yashqa kirgen wejiye qashqa xanim 23-noyabir küni rus saqchiliri teripidin simféropol shehiridiki öyidin tutup kétilgen. U tutup kétilip uzun ötmey shu yerdiki bir doxturxanida rus saqchilirining nazariti astida ölüp ketken.

Xewerde déyilishiche, wejiye qashqa xanim bilen bir künde tutqun qilin'ghan tatar siyasiy aktipliridin békir dégérmenchi, hasan chapuq we qasim emetof qatarliqlarmu bar bolup, ularning teqdiri téxiche éniq emes iken.

82 Yashliq tatar siyasiy pa'aliyetchi wejiye xanimning rus da'iriliri teripidin tutqun qilinip uzun ötmey ölüp kétishi, ukra'ina we yawropa ittipaqining diqqitini qozghighan. Shu küni yawropa ittipaqining re'isi donald task bilen ukra'ina prézidénti pétro poroshénko derhal bayanat élan qilip, bu weqeni "Bügünki qirimda yüz bergen qorqunchluq weqe," dégen. Ular, wejiye qashqa xanimning hayati "Qirim tatarlirining milliy menpe'etlirini qoghdash yolida untulmas bir tarix yaratti," dégen.

Sabiq sowétlar ittipaqi parchilan'ghandin kéyin ukra'ina tewelikide turup kelgen qirim yérim arili 2014-yili 3-ayda rus armiyisi teripidin ishghal qilin'ghan. Stalin dewride özining ittipaqdash jumhuriyetlik ornidin mehrum bolghan qirim tatarliri 20-esirdin buyan basturulush, kolléktip sürgün qilinish we assimilyatsiye qilinish qismetlirige uchrighan. Tarixchilar, 20-esirdin buyan qirim tatarliri duch kelgen bu qismetlerni Uyghur we tibetler duch kelgen qismetler bilen sélishturma qilidu.

Toluq bet