Tataristan jumhuriyiti öz tewelikidiki mekteplerde tatar tilini qoghdash herikiti qozghighan

Muxbirimiz qutlan
2017.09.10

“Azadliq radiyosi” ning xewer qilishiche, 7-séntebir küni tataristan jumhuriyitining ma'arip ministirliqi tatar tilining qanuniy ornini qoghdash heqqide bayanat élan qilghan.

Bayanatta rusiye prézidénti wladimir putinning til mesiliside qilghan sözining hem rusiye fédératsiyesining asasiy qanunigha we rusiye tewesidiki milliy jumhuriyetlerning yerlik qanunigha xilap ikenliki alahide eskertilgen.

Xewerde déyilishiche, rusiye prézidénti wladimir putin bu yil 7-ayda rusiye tewesidiki mari él jumhuriyitini ziyaret qilghan. U bu jeryanda söz qilip, milliy jumhuriyetlerdiki rus ahalilirige we ularning perzentlirige yerlik milletning tilini zorlap téngish eqilge muwapiq emes, dégen.

Putinning bu sözi rusiye fédiratsiyesi tewesidiki milliy jumhuriyetlerde, bolupmu tataristan jumhuriyitide küchlük inkas peyda qilghan. 

Tataristan jumhuriyitining ma'arip ministirliqi derhal inkas qayturup, rusiye fédératsiyesining asasiy qanunida milliy jumhuriyetlerning öz milliy tilini hakimiyet tili qilip ishlitish hoquqigha ige ikenlikini, tataristan jumhuriyitining yerlik qanunidimu tatar tilining rus tili bilen birlikte barliq mekteplerde mejburiy ötilidighan qanuniy til ikenlikini alahide tekitligen.

Tataristan bilen chéchéniye jumhuriyiti rusiye fédiratsiyesi tewesidiki siyasiy jehettin eng sezgür jumhuriyetler bolup, putinning rusiye asasiy qanunigha xilap bolghan bu sözi küchlük ghulghula qozghighan.

4 Milyon nopusqa ige tataristan jumhuriyitining 50 pirsent ahalisi ruslar bolup, sabiq sowét ittipaqi yiqilghandin kéyin tataristan jumhuriyiti yerlik tatar ahalilirining til, medeniyet, diniy étiqad we milliy kimlik jehettiki hoquqlirini kapaletke ige qilish üchün pütün imkaniyetler da'iriside tirishchanliq körsetmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.