Amérika, kanada, awstraliye qatarliq üch dölet eslide taylandtiki 48 Uyghurgha panahliq bérish teklipi sun'ghan

Tayland hökümiti 27-féwral küni 40 neper Uyghur musapirni xitaygha ötküzüp bergendin kéyin, xelq'araning küchlük tenqidige uchrighanidi. Taylandning mu'awin bash ministiri pumtam wichayachay (Pumtham Wechayachai) bu qilmishigha bergen chüshendürüshide, héchqandaq döletning Uyghur musapirlarni qobul qilmighanliqini ilgiri sürgenidi. Halbuki, amérika, kanada we awstraliyening xéli burunla taylandqa 48 Uyghur musapirni öz döletlirige orunlashturush teklipini bildürgenliki otturigha chiqqan.

“Ruytérs agéntliqi” ning bu heqte élan qilghan mexsus xewiride déyilishiche, amérika we kanada hökümiti taylandqa u yerde 10 yildin artuq waqittin béri tutup turulghan Uyghurlarni qobul qilip orunlashturush teklipi bergen bolsimu, tayland hökümiti xitayni renjitip qoyushtin qorqup, héchqandaq heriket qollanmighan hem bu toghriliq héchqandaq xewer bermigen.

“Ruytérs agéntliqi” igiligen melumatlargha qarighanda, bu ishni bilidighan bir amérika emeldari Uyghurlarni ashundaq qayturush weqesining aldini élish üchün, amérikaning yillardin béri tayland bilen hemkarliship kéliwatqanliqini we 48 neper Uyghurni qobul qilishni orunlashturush teklipi bergenlikini ashkarilighan. Uningdin bashqa, kanada bilen awstraliyening diplomatiye we istixbarat sahesidiki 4 kishi kanada bilen awstraliyeningmu 48 Uyghurgha panahliq bérish teklipi sun'ghanliqini bildürgen. Emma tayland xitay bilen bolghan munasiwitige dez kétishidin qorqup, bu tekliplerni basturup qoyghan hemde bu heqtiki uchurlarni sirtqa ashkarilimighan.

“Ruytérs agéntliqi” ning bildürüshiche, nöwette tayland tashqi ishlar ministirliqi buninggha inkas qayturmighan؛ halbuki, 2013-yildin 2017-yilghiche taylandning kanada we amérikada turushluq bash elchisi, 2024-yil dem élishqa chiqishtin ilgiri tayland parlaméntida sénator bolghan bolghan pisan manawapat (Pisan Manawapat) ning bildürüshiche, az dégende üch dölet Uyghurlargha panahliq bérish teklipi sun'ghan. Emma pisan manawapat u döletlerning ismini ashkarilimighan.